मलेसियालाई नेपालको विशाल लक्ष्य

काठमाडौं। ओपनर कुशल भुर्तेलको शतकसँगै नेपालले एसियन गेम्स छनोटमा मलेसियालाई २७६ रनको कीर्तिमानी लक्ष्य दिएको छ।

टस हारेर पहिला ब्याटिङ थालेको नेपालले निर्धारित २० ओभरमा ७ विकेट गुमाउँदै २७५ रन बनाएको हो। मलेसियालाई नेपालले दिएको यो अहिलेसम्मकै कीर्तिमानी लक्ष्य हो।

नेपालका कुशलले सर्वाधिक १२६ रन बनाए। ५४ बल खेलेका उनले १४ चौका र १ छक्का प्रहार गरे। अर्का ओपनर आसिफ शेखले २४ बलमा ५ चौका र ७ छक्कासहित ६८ रनको योगदान दिए।

यी दुईबीच पहिलो विकेटका लागि १३४ रनको साझेदारी भएको थियो। कप्तान दीपेन्द्रसिंह ऐरी ३१ र सन्दीप जोरा १५ रनमा आउट हुँदा अन्यले राम्रो ब्याटिङ गर्न सकेनन्।