रविन्द्र भाटभटेनीका 'ब्रान्ड एम्बेसडर' नियुक्त

काठमाडौं । मिक्स मार्सल आर्ट्स (एमएमए)का अन्तराष्ट्रिय खेलाडी रविन्द्र ढाटलाई भाटभटेनी सुपरमार्केटले ब्रान्ड एम्बेसडर नियुक्त गरेको छ ।

भाटभटेनी र भाटभटेनी अन्तर्गतको पेपे पिज्जाले रविन्द्रलाई तीन वर्षका लागि ब्राण्ड एमबेसडर नियुक्त गरेको हो ।

रविन्द्रको अन्तराष्ट्रिय खेल करियरमा सहयोग पुर्याउने उद्धेश्यले रविन्द्रलाई ब्राण्ड एमबेसडर नियुक्त गरिएको भाटभटेनीले जनाएको छ । सम्झौता अनुसार भाटभटेनीले रविन्द्रलाई नगद र जिन्सी सहित तीन वर्ष प्रायोजन गर्नेछ ।

सम्झौताको रकम दुवै पक्षले खुलाएका छैनन् । तर स्रोतका अनुसार यस सम्झौता करिब ५० लाख रुपैयाँ बराबरको रहेको छ । प्रायोजकको रुपमा भाटभटेनीले तीन वर्षमा करिब ४० लाख नगद र १० लाखको जिन्सी गरी ५० लाख रुपैयाँ बराबरको सहयोग रविन्द्रलाई प्रदान गर्नेछ ।

रविन्द्रले भाटभटेनी सहित पेपे पिज्जा, पेपे आईसक्रिमको ब्राण्डको प्रचार र प्रबद्र्धन गतिविधिमा प्रतिनिधित्व गर्नेछन् ।

भाटभटेनीले अनुशासन, दृढता र उत्कृष्टताप्रतिको निरन्तर प्रयास दुवै पक्षको साझा मुल्य र मान्यता रहेको उल्लेख गर्दै सोही अनुसार रविन्द्रलाई आफ्नो ब्राण्डसँग जोडेको बताएको छ ।

नेपाली प्रतिभालाई प्रोत्साहन गर्नुका साथै देशभरका ग्राहकसँगको सम्बन्ध थप बलियो बनाउने उद्देश्यले यो सहकार्य गरिएको भाटभटेनी होल्डिङ्सका प्रबन्ध निर्देशक आलोक जोशीले बताए ।

विश्व प्रशिद्ध प्रतियोगिता ‘रोड टु यूएफसी’ को तयारीमा रहेका रविन्द्रलाई अन्तर्राष्ट्रिय मञ्चमा नेपालका तर्फबाट उत्कृष्ट प्रदर्शन गर्न यो सहकार्यले थप प्रेरणा प्रदान गर्ने जोशीले विश्वास ब्यक्त गरे ।

सन् १९८४ मा स्थापना भएको भाटभटेनी सुपरमार्केट एन्ड डिपार्टमेन्टल स्टोर नेपालको रिटेल ब्यापारको सबैभन्दा उत्कृष्ट गन्तब्यको रुपमा स्थापित छ । कम्पनीले पेपे पिज्जा र पेपे आइसक्रिमलगायत स्वदेशी ब्रान्डहरू पनि सञ्चालन गर्दै आएको छ।