सानु कराते वर्ल्ड च्याम्पियनसिपमा छनोट

काठमाडौं। नेपालकी सानुमाथा थिङ विश्व कराते च्याम्पियनसिपमा छनोट भएकी छन्। 

वर्ल्ड कराते फेडेरेसन (डब्लूकेएफ) ले बुधबार नेपाल कराते महासंघलाई पत्र पठाउँदै सानु विश्व कराते च्याम्पियनसिप खेल्न छनोट भएको जानकारी दिएको हो। नेपालले पहिलो पटक छनोट भएर विश्व च्याम्पिनयनसिपमा स्थान बनाएको हो।

इजिप्टको कायरोमा हुने च्याम्पियनसिप नोभेम्बर २७ देखि ३० सम्म हुनेछ। उनले महिला एकल कातामा भाग लिनेछिन्।

गत मेमा उज्वेकिस्तानको तास्कन्दमा सम्पन्न २१ औं एकेएफ एसियन सिनियर कराते च्याम्पियनसिपमा उत्कृष्ट प्रदर्शन गर्दै सानुले पाँचौं स्थान हासिल गरेकी थिइन्। त्यही प्रदर्शनका आधारमा उनी विश्व च्याम्पियनसिपलाई छनोट भएकी हुन्। 

दक्षिण एसियाली कराते च्याम्पियनसिपकी टिम कातामा दुई पटक स्वर्ण जितेकी सानुमाया काताका राष्ट्रिय च्याम्पियनसमेत हुन्।