उत्कृष्ट लिब्रो सलिना
काठमाडौं। न्यु डायमन्ड युथ स्पोर्ट्स क्लबकी सलिना श्रेष्ठ प्रचण्ड कप राष्ट्रिय महिला भलिबल प्रतियोगिताको उत्कृष्ट लिब्रो घोषित भएकी छन्।
उनकै कप्तानीमा न्यु डायमन्डले तेस्रो स्थान हात पारेको थियो। उनले २० हजार रुपैयाँ हात पारिन्।
न्यु डायमन्डले समूह चरणमा एभरेस्ट भलिबल क्लब र गण्डकी प्रदेश भलिबल संघलाई ३-० को सोझो सेटमा पराजित गर्दै सेमिफाइनलमा स्थान बनाएको थियो। तर, फाइनल प्रवेश गर्न भएको खेलमा भने एपिएफ क्लबले न्यु डायमन्डलाई ३-० को सोझो सेटमा पराजित गर्यो।
न्यु डायमन्डले तेस्रो स्थानका लागि एभरेस्टसँग नै खेलेको थियो। उक्त खेलमा न्यु डायमन्डले समूह चरणमा जस्तै सोझो सेटमा जित हासिल गर्यो। योसँगै न्यु डायमन्ड १ लाख ४० हजार लिएर काठमाडौं फर्किने भएको छ।
तेस्रो स्थान हात पारेको न्यु डायमन्डले १ लाख रुपैयाँ प्राप्त गरेको थियो। व्यक्तिगत विधातर्फ नै न्यु डायमन्डकी सुमित्रा रेग्मी उत्कृष्ट ब्लकर घोषित भइन्। उनले २० हजार रुपैयाँ हात पारिन्।
