एभरेस्ट वुमन्स भलिबल लिग असोजमा

काठमाडौं। एभरेस्ट वुमन्स भलिबल लिग (ईएब्लूभीएल) को तेस्रो संस्करण आगामी असोजमा हुने भएको छ।

आयोजकका अनुसार काठमाडौंस्थित दशरथ रंगशाला कभर्ड हलमा आयोजना हुने प्रतियोगिता अक्टोबर १ देखि १०, २०२६ (असोज १५ देखि २४, २०८३) सम्म हुनेछ।

पहिलो संस्करणमा चितवन शक्ति, गण्डकी थन्डर्स, कर्णाली यश्वी, काठमाडौं स्पाइकर्स, ललितपुर क्विन्स र मधेश युनाइटेड सहभागी थिए। उक्त संस्करणको फाइनलमा ललितपुरलाई ३–२ को सेटमा पराजित गर्दै कर्णालीले उपाधि जितेको थियो।

दोस्रो संस्करणमा भने चितवन र गण्डकी बाहिरिएका थिए। उक्त संस्करणमा नयाँ टोलीका रूपमा लुम्बिनी लाभास र पोखरा निन्जास थपिएका थिए। उक्त संस्करणको फाइनलमा पनि कर्णालीले ललितपुरलाई ३–२ को सेटमा हराएको थियो।