इम्मोबिलेले १७ वर्षपछि लिए सन्न्यास

काठमाडौं। इटाली तथा लाजियोका पूर्वस्टार स्ट्राइकर सिरो इम्मोबिलेले १७ वर्ष लामो व्यावसायिक फुटबल करिअरबाट सन्न्यास लिएका छन्। फ्रेन्च क्लब पेरिस एफसीले शुक्रबार यसको पुष्टि गरेको हो।

पेरिस एफसीका अनुसार ३६ वर्षीय इम्मोबिलेले आफ्नो अधिकांश समय परिवार तथा प्रियजनहरूसँग बिताउने इच्छा व्यक्त गर्दै खेलाडी जीवन अन्त्य गर्ने निर्णय गरेका हुन्।

इम्मोबिलेले गत फेब्रुअरीमा बोलोग्नाबाट पेरिस एफसीमा आबद्ध भएका थिए। उनले फ्रेन्च क्लबका लागि १२ लिग–१ खेल खेल्दै दुई गोल गरे। क्लब फुटबलमा उनले विभिन्न टोलीका लागि ५९९ खेलमा ३०६ गोल गरेका छन्। इटालीको राष्ट्रिय टोलीबाट भने उनले ५७ खेलमा १७ गोल गरे।

इम्मोबिले सन् २०२० मा युरोपियन ‘गोल्डेन शू’ जित्ने खेलाडी पनि हुन्। उनले त्यस सिजन सिरिएमा ३६ गोल गर्दै गोन्जालो हिग्वाइनको एक सिजनमा सर्वाधिक ३६ गोल गर्ने कीर्तिमान बराबर गरेका थिए। उनी चार पटक सिरिएका सर्वाधिक गोलकर्ता बने।

उनको करिअरको सबैभन्दा सफल अवधि लाजियोमा बित्यो। रोमस्थित क्लबका लागि आठ सिजन खेल्दा उनले ३४० खेलमा २०७ गोल गरे र लाजियोका सर्वाधिक गोलकर्ता बने। उनले क्लबबाट एक कोपा इटालिया र दुई इटालियन सुपर कप उपाधि जिते।

इम्मोबिले सन् २०२१ मा सम्पन्न युरो २०२० जित्ने इटालीको टोलीका महत्वपूर्ण सदस्य थिए। कोभिड–१९ महामारीका कारण एक वर्ष ढिलो भएको उक्त प्रतियोगितामा उनले दुई गोल गरेका थिए। इटालीले वेम्बलीमा भएको फाइनलमा इङ्ल्यान्डलाई पराजित गर्दै उपाधि जितेको थियो।

उनले इटालीका युभेन्ट्स, पेस्कारा, जेनोआ र टोरिनोका साथै जर्मनीको बोरुसिया डर्टमन्ड, स्पेनको सेभिया र टर्कीको बेसिक्टासबाट पनि खेले। १७ वर्षको व्यावसायिक करिअरमा इम्मोबिलेले क्लब र राष्ट्रिय टोलीबाट कुल ३२३ गोल गर्दै आफ्नो पुस्ताका उत्कृष्ट इटालियन स्ट्राइकरमध्ये एकका रूपमा करिअर टुंग्याएका छन्।