विभागीय डर्बीमा पुलिसको सानदार जित

पोखरा। विभागीय डर्बीमा जित निकाल्दै नेपाल पुलिस क्लबले प्रचण्ड कप महिला भलिबल प्रतियोगितामा सुखद् सुरुआत गरेको छ।

पोखरा कभर्डहलमा मंगलबार सम्पन्न पहिलो खेलमा पुलिसले अर्को विभागीय टोली एपिएफ क्लबलाई ३–० को सोझो सेटमा पराजित गरेको हो। योसँगै पुलिसले २ अंक जोडेको छ। 

पहिलो सेट निकै नै प्रतिस्पर्धात्मक भएको थियो। एक समय पुलिसलाई एपिएफले २२–२२ ले चुनौती दिइरहेको थियो। तर, एपिएफलाई २२ अंकमा रोक्दै पुलिसले खेल २५–२२ ले आफ्नो पक्षमा पार्‍यो।

दोस्रो सेटमा पनि एपिएफले १८–१५ ले अग्रता लिएको थियो। तर, एपिएफले उक्त अग्रता जोगाउन सकेन। त्यसपछि २५–२५ हुँदै पुलिसले खेलमा २७–२५ अंकसहित सेट आफ्नो हातमा राख्यो। योसँगै खेलमा पुलिस २–० ले अगाडि रह्यो।

तेस्रो तथा अन्तिम सेट भने पुलिसले २५–१७ ले सहजै आफ्नो पक्षमा राख्यो।