एसियन सभात च्याम्पियनसिपमा नेपाललाई चार स्वर्णसहित २२ पदक 

काठमाडौं। छैटौं एसियन सभात प्रतियोगितामा नेपालले चार स्वर्ण, चार रजत र १४ कांस्य गरी कुल २२ पदक जितेको छ। 

भारतको दिल्लीस्थित तालकटोरा स्टेडियममा सम्पन्न प्रतियोगितामा एसियाली राष्ट्रहरू नेपाल, इरान, उज्बेकिस्तान, चाइनिज ताइपेई, बंगलादेश, भारतलगायत देशका खेलाडीहरूले विभिन्न उमेर समूहमा असट् (लाइट कनट्याक्ट) तर्फ र कम्ब्याट (फुल कनट्याक्ट) तर्फ प्रतिस्पर्धा गरेका थिए। 

उक्त प्रतियोगितामा लाइट कनट्याक्ट महिलातर्फ १२ वर्षमुनि–३३ केजीमा नेपालकी आयुशा मगरले रजत पदक जितिन्।उनले क्वार्टरफाइनलमा बंगलादेश र सेमिफाइनलमा भारतकी खेलाडीलाई पराजित गरेकी थिइन्।

तर, फाइनलमा भारतकै तनुजासँग पराजित भइन्। –४३ केजीमा नेपालकी हिमान्शी दुलाल क्वार्टरफाइनलमा भारतकी करुणा कुमारी र सेमिफाइनलमा उज्बेकिस्तानकी सोलिहा र फाइनल खेलमा नेपालकी अनिशा भण्डारीलाई पराजित गरी स्वर्ण पदक जितिन्। सोही तौल समूहमा अनिशाले रजत जितिन्। 

उनले बांगलादेश र भारतकी खेलाडीलाई पराजित गरेकी हुन्। सिनियर–५२ केजीमा आरती सिखवालले सेमीमा र फाइनलमा भारतकै खेलाडीलाई पराजित गरी स्वर्ण पदक जितिन्।  

सोही समूहको कम्ब्याटमा भने सेमिफाइनलमा उज्बेकिस्तानकी खेलाडीसँग पराजित भई कांस्य पदकमा चित्त बुझाइन्। –५६केजीमा सुष्मा घ्याबाले कांस्य प्राप्त गरिन्। उनी लाइट कनट्याक्टमा सेमिफाइनलमा भारतकी खेलाडीसँग पराजित भइन्। 

पुरुष १२ वर्षमुनि –३२ केजीमा वसन्त तामाङले कांस्य जिते। क्वार्टरफाइनलमा उज्बेकिस्तानको नूरालिवलाई पराजित गरेका उनी सेमिफाइनलमा सोही राष्ट्रकै खेलाडीसँग पराजित भए। –४० केजीमा सुभम खत्रीले कांस्य जिते। उनले क्वार्टरफाइनलमा भारतका शेख माहिरलाई पराजित गरे भने सेमिफाइनलमा भारतकै खेलाडीसँग पराजित भए।

सोही तौल समूहमा नेपालकै विश्वास भट्टराईले  क्वार्टरमा भारतका हर्षलाई पराजित गरी सेमीमा नेपालकै सुन्दर पाँडेसँग पराजित भएका थिए। 

तर, सुन्दर सोही समूहमा भारतलाई फाइनलमा पछि पारी स्वर्ण पदक जित्न सफल भए।–५६ केजीमा प्रशान्त बूढामगरले क्वार्टरमा भारतका उत्कर्ष कालोखेलाई हराएका थिए तर सेमिमा उज्बेकिस्तानका सगीदुल्लाभसँग पराजित भई कांस्यमा चित्त बुझाए।

–६० केजीमा विनय थापाले (रजत) क्वार्टर र सेमिमा भारतका रेहन र करण दीपलाई पराजित गरे। तर, उनी भारत कै सूर्योदयसँग पराजित भए। 

१७ वर्षमुनि–५२ केजीमा जयराम विके (कांस्य) ले सेमिफाइनलमा उज्बेकिस्तानका सोबिरोवसँग पराजित भए। –८५ केजीमा बसील त्वयनाले सेमिफाइनल र फाइनलमा भारत कै खेलाडीलाई पराजित गरी स्वर्ण पदक जिते। 

कम्ब्याट–६० केजीमा प्रभु राम खत्रीले रजत, –५६ केजीमा सुरज कार्कीले कांस्य, –६० केजीमा मनील श्रेष्ठले कांस्य, –७० केजीमा आस्तिक नकर्मीले कांस्य, कम्ब्याट तर्फ–६५केजीमा शान्तकुमार राना मगर, कांस्य र सिनियर–७५ केजीमा सस्मन बस्नेतले कांस्य जिते।