काठमाडौं। शाइन रेसुङ्गा राष्ट्रिय टेन के रनको सद्भावना दूतमा वैकुण्ठ मानन्धरलाई नियुक्त गरिएको छ।
फागुनको ११ गते बुटवलमा आयोजना हुने सर्वाधिक पुरस्कार राशिको १० किलोमिटरको दौड प्रतियोगितामा कीर्तिमानी धावक तथा ओलम्पियन मानन्धरलाई सद्भावना दूतमा नियुक्त गरिएको हो।
दक्षिण एसियाली खेलकुद प्रतियोगिताका कीर्तिमानी धावक मानन्धरले दौड संस्कृतिलाई प्रवर्द्धन गर्ने उद्देश्यले आयोजना गर्न लागिएको प्रतियोगितामा सद्भावना दूत नियुक्त गरिएकोमा आयोजक शाइन रेसुङ्गा बैंक परिवारलाई धन्यवाद दिएका छन्।
उनले आम मानिसको स्वास्थ्य जीवनशैलीका लागि हरेक दिन दौडने संस्कृतिको विकास गर्नमा सबै जना लाग्नुपर्ने बताएका छन्।
‘रन टू शाइन’ भन्ने नाराका साथ हुने दौड प्रतियोगितामा कुल पुरस्कार राशि पाँच लाख रुपैयाँ राखिएको छ। तीन विधा समावेश प्रतियोगितामा खुल्लातर्फको महिला÷पुरुष विजेताले समान एक एक रुपैयाँ प्राप्त गर्नेछन्।
दोस्रो हुनेले जनही ४० हजार, तेस्रो हुनेले २० हजार, चौथोले १५ हजार र पाँचौं हुनेले जनही १० हजार रुपैयाँ प्राप्त गर्नेछन्।
स्थानीयतर्फ ५ किलोमिटरको दौड र ५० वर्षभन्दा माथिको स्थानीय गरी अन्य दुई विधाका विजेता महिला पुरुष खेलाडीले जनही १५ हजार, दोस्रोले १० हजार, तेस्रोले ५ हजार, चौथोले २ हजार पाँच सय रुपैयाँ प्राप्त गर्नेछन्।
प्रतियोगितामा सहभागी हुन इच्छुक खेलाडी तथा धावकले शाइन रेसुङ्गा डेभल्पमेन्ट बैंकको आधिकारिक वेबसाइटमा गई अथवा सिधै https://srdb.com.np/campaign/shineresungarun लिंकमा गएर नाम दर्ता गर्न सक्नेछन्।
दौड बैंकको केन्द्रीय कार्यालय कालिकानगरबाट सुरु भएर मणिग्राम चोक हुँदै पुन केन्द्रीय कार्यालयमा पुगेर समापन हुने कार्य तालिका रहेको छ। प्रतियोगितालाई राष्ट्रिय खेलकुद परिषद् र नेपाल एथलेटिक्स संघले स्वीकृति प्रदान गरेका छन्।
