नेपालले सिंगापुरलाई १५१ रनले हरायो
काठमाडौं। सना प्रवीनको शानदार अविजित ९८ रन र सावित्री धामीको अविजित ७८ रनको मद्दतमा नेपालले एसीसी महिला यू–१९ प्रिमियर कप २०२६ मा सिंगापुरमाथि १५१ रनको फराकिलो जित निकालेको छ।
मलेसियाको बाँगीस्थित वाईएसडी यूकेएम ओभलमा आइतबार भएको खेलमा नेपालले प्रस्तुत गरेको २०० रनको विशाल लक्ष्य पछ्याएको सिंगापुरले निर्धारित २० ओभरमा आठ विकेट गुमाएर ४८ रन मात्रै बनाउन सक्यो।
त्यसअघि नेपालले निर्धारित २० ओभरमा कुनै पनि विकेट नगुमाई १९९ रनको विशाल योगफल तयार गरेको थियो।
नेपालका लागि सना प्रवीनले उत्कृष्ट ब्याटिङ गर्दै ७० बलमा १३ चौकासहित अविजित ९८ रन बनाइन्। उनी शतक पूरा गर्न केवल दुई रनले चुकिन्।
अर्की ब्याटर सावित्री धामीले पनि आक्रामक प्रदर्शन गर्दै ५३ बलमा १३ चौकासहित अविजित ७८ रनको योगदान दिइन्।
सना र सावित्रीले अविजित १९९ रनको साझेदारी गर्दै नेपाललाई बलियो अवस्थामा पुर्याएका थिए। नेपालले अतिरिक्तबाट २३ रन प्राप्त गर्यो।
विशाल लक्ष्य पछ्याएको सिंगापुरका ब्याटरले नेपाली बलिङसामु खुलेर खेल्न सकेनन्। सिंगापुरले निर्धारित ओभरमा ४८ रन मात्रै बनाएपछि नेपालले प्रतियोगितामा प्रभावशाली जित दर्ता गरेको हो।
प्रतियोगिताको पहिलो खेलमा नेपालले कतारलाई हराएको थियो ।
