फ्रान्स-स्पेन र इंग्ल्यान्ड-अर्जेन्टिना भिड्ने

काठमाडौं। फिफा विश्वकप २०२६ को सेमिफाइनल समीकरण पूरा भएको छ। उपाधि होडमा रहेका चार टोलीमध्ये फ्रान्सले स्पेनसँग तथा इंग्ल्यान्डले साविक विजेता अर्जेन्टिनासँग प्रतिस्पर्धा गर्ने भएका छन्।

पहिलो सेमिफाइनल जुलाई १४ मा डलास स्टेडियममा फ्रान्स र स्पेनबीच हुनेछ।

फ्रान्सका प्रमुख फरवार्ड किलियन एमबाप्पे र स्पेनका युवा स्टार लामिन यामालमाथि यस खेलमा विशेष नजर रहनेछ। प्रतिभाशाली खेलाडीले भरिएका दुवै टोलीबीचको भिडन्त रोमाञ्चक हुने अपेक्षा गरिएको छ।

दोस्रो सेमिफाइनल जुलाई १५ मा एटलान्टा स्टेडियममा इंग्ल्यान्ड र अर्जेन्टिनाबीच हुनेछ। इंग्ल्यान्डको आक्रमण ह्यारी केनले सम्हाल्नेछन् भने अर्जेन्टिनाको चुनौतीको नेतृत्व कप्तान लियोनल मेस्सीले गर्नेछन्।

चारै टोली अब प्रतिष्ठित विश्वकप ट्रफीबाट केवल दुई जित टाढा छन्। सेमिफाइनलका विजेताले फिफा विश्वकप २०२६ को उपाधिका लागि फाइनलमा प्रतिस्पर्धा गर्नेछन्।