क्वार्टरफाइनल जितपछि मेसी उत्साहित: ‘यो जित निकै कठिन थियो’
काठमाडौं। ३–१ को नतिजा हेर्दा अर्जेन्टिनाले सहज जित निकालेको जस्तो देखिए पनि खेलको वास्तविक चित्र फरक थियो।
१० खेलाडीमा सीमित भएको स्विट्जरल्यान्डविरुद्ध निर्धारित ९० मिनेट १–१ को बराबरीमा सकिएको थियो। अतिरिक्त समयको पहिलो हाफसम्म पनि डिफेन्डिङ च्याम्पियन अर्जेन्टिनाले अग्रता लिन सकेन। तर अन्तिम १५ मिनेटमा जुलियन अल्भारेज र लाउटारो मार्टिनेजले गोल गर्दै टोलीलाई ३–१ को महत्त्वपूर्ण जित दिलाए।
यस जितसँगै अर्जेन्टिनाले विश्वकपको सेमिफाइनलमा स्थान सुरक्षित गरेको छ। खेलपछि कप्तान लिओनल मेसीले टोलीको प्रदर्शनप्रति खुसी व्यक्त गरे।
अघिल्लो चरणमा इजिप्टविरुद्ध पछाडि परेको अवस्थाबाट रोमाञ्चक जित निकालेपछि भावुक बनेका मेसी यसपटक भने निकै उत्साहित देखिए। अन्तिम सिटीसँगै उनले जर्सी फुकालेर टोलीका साथीहरूसँग विजयोत्सव मनाएका थिए।
खेलपछि मेसीले भने, ‘यो जितले मलाई निकै खुशी बनाएको छ। यो जित सजिलो थिएन, हामीले धेरै संघर्ष गर्नुपर्यो।’
उनले थपे, ‘हामीलाई सुरुदेखि नै थाहा थियो कि यो खेल निकै प्रतिस्पर्धात्मक हुनेछ।’
क्वार्टरफाइनलको चुनौती पार गर्नु राहतको विषय भएको उल्लेख गर्दै मेसीले भने, ‘अब अगाडि अझ कठिन खेल छ। त्यसअघि यो जित हाम्रो आत्मविश्वासका लागि निकै महत्त्वपूर्ण हो। यसले आगामी खेलको तयारी केही सहज बनाउनेछ।’
अब अर्जेन्टिनाले आगामी बुधबार एटलान्टामा हुने सेमिफाइनलमा परम्परागत प्रतिद्वन्द्वी इंग्ल्यान्डसँग फाइनल प्रवेशका लागि प्रतिस्पर्धा गर्नेछ।
