अर्जेन्टिना किन कालो आर्मब्यान्ड लगाएर मैदानमा उत्रियो?
काठमाडौं। स्विट्जरल्यान्डविरुद्धको विश्वकप क्वार्टरफाइनल खेलअघि अर्जेन्टिनाले दुःखद समाचार प्राप्त गर्यो।
राष्ट्रिय टोलीका पूर्वकप्तान आन्टोनियो उबाल्दो राट्टिनको शनिबार ८९ वर्षको उमेरमा निधन भएको हो। उनको सम्मान र शोक व्यक्त गर्न अर्जेन्टिनाका खेलाडीहरू कालो आर्मब्यान्ड बाँधेर मैदानमा उत्रिएका थिए। खेल सुरु हुनुअघि अर्जेन्टिना र स्विट्जरल्यान्डका खेलाडीहरूले एक मिनेट मौनधारण पनि गरे।
राट्टिन अर्जेन्टिनी फुटबलका महान् मिडफिल्डरमध्ये एक मानिन्छन्। क्लब र राष्ट्रिय टोली दुवैका लागि उनले गरेको योगदान आज पनि फुटबल इतिहासमा स्मरणीय छ। उनी बोका जुनियर्सका इतिहासकै उत्कृष्ट कप्तानमध्ये एक थिए।
सन् १९६० को दशकमा बोका जुनियर्सको स्वर्णिम यात्राका प्रमुख पात्र रहेका राट्टिन त्यही अवधिमा अर्जेन्टिनाको राष्ट्रिय टोलीका नियमित सदस्य पनि थिए। उनले सन् १९६२ को चिली विश्वकप र सन् १९६६ को इंग्ल्यान्ड विश्वकप खेलेका थिए। विशेषगरी सन् १९६६ विश्वकपमा उनको विवादास्पद रातो कार्ड र मैदानबाट बहिर्गमन फुटबल इतिहासकै चर्चित घटनामध्ये एक मानिन्छ।
‘एल राटा’ उपनामले परिचित राट्टिन आफ्नो जुझारु स्वभाव, दृढ व्यक्तित्व र नेतृत्व क्षमताका लागि प्रसिद्ध थिए। उनले बोका जुनियर्समा रक्षात्मक मिडफिल्डरको भूमिकालाई नयाँ उचाइमा पुर्याएका थिए। पछि रुबेन सुये, ब्लास आर्मान्दो जिउन्ता र मौरिसियो सेर्नाजस्ता खेलाडीहरूले पनि उनको पदचिह्न पछ्याए।
राट्टिनले आफ्नो सम्पूर्ण व्यावसायिक करियरमा केवल दुई टोलीको जर्सी लगाएका थिए—क्लब फुटबलमा बोका जुनियर्स र अन्तर्राष्ट्रिय फुटबलमा अर्जेन्टिनाको राष्ट्रिय टोली। बोका जुनियर्सको युवा एकेडेमीबाट उदाएका उनले १९ वर्षको उमेरमा सिनियर टोलीबाट डेब्यु गरेका थिए र त्यसपछि लगातार १५ वर्षसम्म क्लबका लागि खेले।
बोका जुनियर्सका लागि उनले ३८२ खेल खेले, जसका सबै खेलमा उनी सुरुआती ११ मा समावेश थिए। क्लबसँग उनले सन् १९६२, १९६४ र १९६५ का लिग उपाधि तथा सन् १९६९ को कोपा अर्जेन्टिना जितेका थिए।
क्लब स्तरमा निरन्तर उत्कृष्ट प्रदर्शनका कारण उनी अर्जेन्टिनाको राष्ट्रिय टोलीका भरपर्दा खेलाडी बने। सन् १९५९ देखि १९६९ सम्म उनले राष्ट्रिय टोलीका लागि २१ अन्तर्राष्ट्रिय खेल खेले। तीमध्ये पाँच खेल विश्वकप र तीन खेल कोपा अमेरिकामा थिए। राष्ट्रिय टोलीका लागि उनले एक गोल पनि गरेका थिए।
