गण्डकीलाई हराउँदै पुलिसले जित्यो टाइगर कप

पोखरा। गण्डकी भलिबल एसोसिएसनलाई पराजित गर्दै विभागीय टोली नेपाल पुलिस क्लबले टाइगर ग्रुपले पाँचौं टाइगर कप राष्ट्रिय तथा अन्तर्राष्ट्रिय भलिबल प्रतियोगिताको पुरुषतर्फको उपाधि जितेको छ।

पोखरा रंगशालामा आइतबार सम्पन्न फाइनलमा गण्डकीलाई ३–१ को सेटमा पराजित गर्दै पुलिसले उपाधि चुमेको हो। पुलिसले पहिलो र दोस्रो सेट २५–२३ र २५–२१ ले जितेको थियो। तर, तेस्रो सेट २०–२५ ले जित्दै गण्डकीले कमब्याक गर्‍यो। यद्यपि, निकै रोमाञ्चक रहेको चौथो सेट २५–२२ ले आफ्नो पक्षमा पार्दै पुलिसले उपाधि पक्का गर्‍यो।

उपाधि जितेको पुलिसले पाँच लाख ८५ हजार ५५५ रुपैयाँ प्राप्त गर्‍यो। फाइनलमा पराजित भएको गण्डकीले दुई लाख ८५ हजार ५५५ रुपैयाँमा चित्त बुझायो।

यसअघि भएको महिलातर्फको फाइनलमा सशस्त्र प्रहरी बल (एपिएफ) क्लबलाई ३–२ को सेटले पराजित गर्दै आयोजक टोली टाइगर ग्रुपले पहिलो पटक उपाधि जितेको थियो।