टाइगर कपमा दुई क्वालिफायर र एक इलिमिनेटरका खेल हुँदै

पोखरा। पाँचौं टाइगर कप राष्ट्रिय तथा अन्तर्राष्ट्रिय भलिबल प्रतियोगिताको शुक्रबार पहिलो क्वालिफायर र इलिमिनेटरका खेल हुँदैछन्। 

पोखरा रंगशालास्थित भलिबल कोर्टमा हुने पहिलो खेल महिलातर्फको हुनेछ । महिलातर्फ पहिलो क्वालिफायरमा आयोजक टाइगर ग्रुप र सशस्त्र प्रहरी बल (एपिएफ)बीच प्रतिस्पर्धा हुनेछ । एपिएफ अपराजित टोली हो भने आयोजक टोली एपिएफसँग पराजित भएको थियो । यो खेलमा विजेता हुने टोली फाइनल पुग्नेछ भने पराजित हुने टोलीले इलिमिनेटर विजेता न्यू डायमन्ड स्पोर्ट्स क्लबसँग दोस्रो क्वालिफायर खेल्नेछ ।

शुक्रबार हुने दोस्रो खेल पुरुषतर्फको पहिलो क्वालिफायरको खेल हुनेछ । बिहान ११ बजे सुरु हुने उक्त खेल त्रिभुवन आर्मी क्लब र नेपाल पुलिस क्लबबीच हुनेछ । आर्मी समूहचरण शीर्ष र पुलिस दोस्रो स्थानमा रहँदै पहिलो क्वालिफायरमा स्थान पक्का गरेका थिए ।

तेस्रो खेल पुरुषतर्फको इलिमिनेटर हुनेछ। दिउँसो १ बजे सुरु हुने इलिमिनेटरमा गण्डकी प्रदेश र भारतको सुनिल भलिबल क्लब प्रतिस्पर्धा गर्नेछन् । इलिमिनेटरको विजेताले पुलिस र आर्मीबीचको पराजित हुने टोलीसँग दोस्रो क्वालिफायर खेल्नेछ ।