पोखरा। नेपाल पुलिस क्लबलाई पराजित गर्दै न्यु डायमन्ड स्पोर्ट्स क्लब पाँचौं टाइगर कप राष्ट्रिय तथा अन्तर्राष्ट्रिय क्लब महिला तथा पुरुष भलिबल प्रतियोगिताको महिलातर्फ दोस्रो क्वालिफायरमा प्रवेश गरेको छ ।
पोखरा रंगशालामा बिहीबार बिहान भएको एलिमिनेटर खेलमा न्यु डायमन्डले पुलिसलाई ३–० को सोझो सेटमा पराजित गरेको हो । न्यु डायमन्डले पहिलो सेट २५–२२, दोस्रो सेट २५–१४ र तेस्रो सेट २५–२१ ले आफ्नो पक्षमा पार्यो ।
यसअघि न्यु डायमन्डले लिग चरणमा पनि पुलिसलाई पराजित गरेको थियो । पुलिस ‘हार्ने समूह’ बाट शीर्ष स्थान र न्यु डायमन्ड ‘जित्ने समूह’ बाट तेस्रो स्थानमा रहँदै इलिमिनेटरमा प्रवेश गरेका थिए ।
न्यु डायमन्डले अब फाइनल प्रवेशका लागि सशस्त्र प्रहरी बल एपिएफ र आयोजक टाइगर ग्रुपबिचको खेलमा पराजित हुने टोलीसँग प्रतिस्पर्धा गर्नेछ । अब दोस्रो खेल त्रिभुवन आर्मी क्लब र भारतको सुनिल भलिबल क्लबबीचको खेल सुरु हुनेछ । उक्त खेल समय अभावका कारण बुधबार स्थगित भएको थियो । यो खेलको क्वालिफायर खेल्ने र इलिमिनेटर खेल्ने टोलीको टुंगो लगाउनेछ ।
तेस्रो खेल गण्डकी प्रदेश र टिपटप हेल्प नेपाल स्पोर्ट्स क्लबबीच हुनेछ । उक्त खेल दिउँसो १ बजे सुरु हुनेछ । उक्त खेलको विजेताले इलिमिनेटर खेल्नेछ ।
-1738250810.jpeg)
