टाइगर कपमा यसरी हुन्छन् लिगचरणका खेल 

पोखरा। पाँचौं टाइगर कप राष्ट्रिय तथा अन्तर्राष्ट्रिय क्लब महिला तथा पुरुष भलिबल प्रतियोगिताअन्तर्गत सोमबार चार खेल हुने भएका छन्। 

शनिबारबाट सुरु भएको प्रतियोगिताको तेस्रो दिन सोमबार महिलातर्फ दुई र पुरुषतर्फ दुई खेल हुने तालिका छ। अब लिगचरणका खेल हुनेछ। सबै टोलीले एक/एक खेल खेलेपछि अहिले जित्ने र हार्ने टोलीको छुट्टाछुट्टै समूह बनेका छन्। ती समूहअन्तर्गत लिग खेल हुनेछ।

एउटै समूहमा रहने टोलीले एक अर्कासँग खेल्नेछन्। पोखरा रंगशालास्थित भलिबल कोर्टमा बिहान पौने ९ बजे पहिलो खेल हुनेछ। उक्त खेल महिलातर्फ ‘जित्ने समूह’का टिपटप न्यू डायमन्ड स्पोर्ट्स क्लब र शसस्त्र प्रहरी बल एपिएफबिच प्रतिस्पर्धा हुनेछ। 

दोस्रो खेल महिलातर्फ ‘हार्ने समूह’का ट्राभल इन्क्वारी युनाइटेड प्यासन भलिबल क्लब थाइल्यान्ड र नेपाल पुलिस क्लबले खेल्नेछन्। उक्त खेलमा पौने ११ बजेबाट सुरु हुनेछ। 

तेस्रो खेल पुरुषतर्फ ‘जित्ने समूह’का भारतको सुनिल भलिबल क्लब र नेपाल पुलिस क्लबले प्रतिस्पर्धा गर्नेछन्। भोलिको अन्तिम तथा चौथो खेल पुरुषतर्फ ‘हार्ने समूह’का गण्डकी प्रदेश र टिपटप हेल्प नेपाल स्पोर्ट्स क्लबबिच हुनेछ। 

लिगपछि ‘जित्ने समूह’ बाट शीर्ष दुई टोली फाइनल प्रवेशका लागि पहिलो क्वालिफायर खेल्नेछन्। तेस्रो स्थानमा रहने र ‘हार्ने समूह’ बाट शीर्ष स्थानमा रहने टोलीले इलिमिनेटरमा भिड्नेछन्। 

पहिलो क्वालिफायरमा पराजित हुने टोली र इलिमिनेटरमा विजेता हुने टोलीले दोस्रो क्वालिफायर खेल्नेछ। ‘हार्ने समूह’ बाट दोस्रो र तेस्रो स्थानमा रहने टोली प्रतियोगिताबाट बाहिरिनेछन्। टाइगर ग्रुप अफ पोखराको आयोजनामा भएको उक्त प्रतियोगिता माघ १९ गतेसम्म चल्नेछ।