नेपाल भलिबल लिगको तयारीमा तीव्रता 

काठमाडौं। नेपाली खेलकुदमा पछिल्लो समय फ्रेन्चाइज लिगको रोमाञ्चकता बढिरहँदा देशका हरेक भुभागमा खेलिने भलिबलको लिग आयोजनाले नेपाली समर्थक धेरै उत्साहित छन् ।

क्रिकेट, महिला भलिबल, कबड्डीको फ्रेन्चाइज लिग भैरहँदा पुरुष भलिबल लिगको तयारीमा तीव्रता दिइएको छ । नेपालको व्यावसायिक घरना तथा खेलप्रति चासो राख्ने केडिया ग्रुपले नेपाल भलिबल लिग गर्दै छ । नेपालको राष्ट्रिय खेल भलिबलको फ्रेन्चाइज लिग आयोजनाले समर्थक पनि उतिकै उत्साहित र प्रतीक्षामा छन् । यता, नेपाल भलिबल लिग (एनभिएल) छिट्टै सुरु गर्ने गरी आयोजक पनि जुटेको छ । केडिया ग्रुपले यस लिगमा ‘उचाइको नयाँ उडान’ भन्ने स्लोगन दिएको छ । सो स्लोगनजस्तै भलिबललाई पनि नयाँ उचाइ दिने लक्ष्यसहित केडिया ग्रुपले तयारी थालेको हो ।

नेपाली खेलकुदमा पछिल्ला समय एकपछि अर्को फ्रेन्चाइज लिग सञ्चालनमा भइरहेका छन् । यी आयोजनाले खेलमार्फत आम मानिसहरूलाई आकर्षण पनि गरिरहेको छ । विश्व स्तरीय स्टार खेलाडी नेपालमा भित्रिँदा नेपालमा सर्वत्र चासो बढ्नु स्वाभाविक पनि हो । केडिया ग्रुप नेपाली खेलकुद समर्थकलाई ध्यानमा राखेर नै लिगलाई छिट्टै उचाइ र रोमाञ्चकता दिने प्रयासमा छ । पहिलोपल्ट पुरुष भलिबल लिग हुन लागेको हो । त्यसैले यसको सुरुआत राम्रो दिने लक्ष्यमा आयोजक छ । दीर्घकालमा यो फ्रेन्चाइजलाई दक्षिण एसियाकै उत्कृष्ट भलिबल लिगका रूपमा स्थापित गर्ने लक्ष्यमा आयोजक रहेको छ । 

त्यसका लागि स्टार खेलाडी भित्राउने, आम दर्शकका लागि योजनासँगै व्यवस्थित रूपमा लिग आयोजना गर्न पछि नपर्ने आयोजकको भनाइ छ । यसअघि नै एनभिएलको लोगो सार्वजनिक भैसकेको छ । युवा तथा खेलकुदमन्त्री तेजुलाल चौधरीले लोगो अनावरण र स्लोगन सार्वजनिक गरेका थिए । साथै एनभिएलमा ६ फ्रेन्चाइज टोलीले खेल्ने पनि टुङ्गो लागिसकेको छ । हरेक फ्रेन्चाइज टोलीको नाम भलिबल खेल लोकप्रिय रहेका क्षेत्र प्राथमिकता राख्ने योजनामा आयोजक छ । सिंगल राउन्ड रोबिनका आधारमा खेल हुने आयोजकले यसअघि नै स्पष्ट पारेको थियो । साथै ९ दिनसम्म चल्ने लिगमा कुल १५ खेल हुनेछन् ।
लिगमा शीर्ष दुई स्थानमा रहने टोलीबीच फाइनल खेल हुने तय भइसकेको छ । भविष्यमा होम एन्ड अवेका आधारमा लिग आयोजना गर्ने केडिया ग्रुपको दीर्घकालीन लक्ष्य छ । 

नेपाल भलिबल संघले केडिया ग्रुपसँग सात वर्षका लागि लिग आयोजना दिनेगरी सम्झौता गरेको हो । केडिया ग्रुपका सिइओ अश्विन केडियाले आफैं पनि भलिबल खेलप्रेमी हुन् । त्यसैले पनि उनले भलिबल खेलको उत्कृष्ट लिग आयोजनाको लक्ष्य राखेका थिए । अब छिटै मिति घोषणासँगै अन्य कार्यक्रम पनि सार्वजनिक गर्ने आयोजकले तयारी थालेको छ । मार्की प्लेयर घोषणा र स्थानीय खेलाडीको आबद्दता पनि छुट्टै टुंग्गो लगाइने भएको छ ।

एनभिएलका सिइओ अश्विन केडिया भलिबल राष्ट्रिय खेल भए पनि यसको थप उचाइका लागि व्यावसायिक लिगको आवश्यकता औंल्याएका छन् । त्यसैले तीन विदेशी खेलाडसहित ट्यालेन्ट हन्टमा सम्भावना बोकेका खेलाडी टिममा राख्न राम्रो माध्यम सिर्जना गर्ने उनले योजना बनाएका छन् । नयाँ  प्रतिभाले विश्वस्तर खेलाडीसँग खेल्न पाउँदा मात्र नेपालको राष्ट्रिय खेल विकासमा ठूलो टेवा पुग्ने उनको बुझाई छ । साथै घरेलु ९ खेलाडीले पनि स्तरीय लिगमार्फत आफ्नो प्रतिभा तिखार्ने अवसर पाउनेछन् । यो लिगमा अन्तराष्ट्रिय भलिबलमा माझ स्थापित गर्न कुनै कसर नराख्ने एनभिएलका सिइओ अश्विनको योजना छ ।