धरान। स्वर्गीय लीला श्रेष्ठ सुब्बा स्मृति कप अन्तरविद्यालय टेबलटेनिस प्रतियोगिता धरानमा सम्पन्न भएको छ, जसमा समावेश ६ स्पर्धामा २० विद्यालयका १२० खेलाडीले प्रतिस्पर्धा गरेका थिए।
यु १२ ब्वाइजमा मेरिल्यान्ड बोर्डिङका सोइल भुजेलले विष्णु मेमोरियलका कृतिक पौडेललाई सोझो तीन सेटमा पराजित गर्दै स्वर्णपदक जिते। पब्लिक हाई स्कुलका कविसन हाई स्कुल र किरातेश्वरका शनि भुजेलले कांस्य पदक हात पारे।
यु १४ ब्वाइजमा मेघा हिमालय स्कुलका गौतम तामाङले फाइनलमा विष्णु मेमोरियलका रेहान कर्माचार्यलाई ११–५, ११–८, ११–७ र १०–१० ले पराजित गर्दै स्वर्णपदक कब्जा गरे। यस स्पर्धामा युरोका आवासीय माविका दुई खेलाडी अभय शाक्य र सोनल ताम्राकारले कांस्य पदक प्राप्त गरे। यु १६ ब्वाइजको फाइनल पनि गौतमविरुद्ध रेहानवीच भएको थियो र यसमा पनि गौतमले बाजी मार्दै दोस्रो स्वर्ण हात पारे।
यु १२ गर्ल्समा युरेका आवासीय माविकी श्रेया सुवेदीले आफ्नै स्कुलकी चन्सया सुवेदीलाई ११–८, ९–११ र ११–७ ले पराजित गर्दै स्वर्णपदक हासिल गरिन्। युरेकाकै अदित्मा मगर र समिट स्कुलकी अधिश्री दाहालले कांस्य हात पारे।
श्रेयाले यु १४ गर्ल्सको फाइनल पनि खेलिन्। तर, उनलाई ११–३, ११–७ र ११–९ ले हराएर सुनाखरी स्कुलकी सुलेखा ठाकुरले स्वर्ण जितिन्। युरेकाकी चन्सया र मेरिल्यान्ड स्कुलकी सरिना राई तेस्रो भए।
दुई दिने प्रतियोगितामा सुलेखाले यु १६ गर्ल्सको पनि उपाधि कब्जा गरिन्। उनले फाइनलमा मेरिल्यान्डकी सरिनालाई ११–४, ११–७ र ११–७ ले पराजित गर्दै दोस्रो स्वर्ण जितेकी हुन्। श्रेया र चन्सया तेस्रोमा रहे।
-1736179870.JPG)
