काठमाडौं। नेपाल जुनियर इन्टरनेसनल सिरिज २०२४ मा पनि नेपाली खेलाडीहरूले उत्साहजनक प्रदर्शन गर्न सकेनन्।
नेपाल ब्याडमिन्टन संघको आयोजनामा भएको प्रतियोगिताको पहिलो दिन मिक्स युगलको राउन्ड अफ ३२ मा नेपालका कबीर महर्जन र रिहान शेरचन भारतका खेलाडी योगांश सिंह र बर्त प्रभु आनन्दसँग पराजित भए। सिंह र आनन्को जोडीले २१–१४, २१–१५ को जित हात पारेका थिए।
यस्तै पुरुष एकलतर्फ पनि नेपाली खेलाडीहरूको प्रदर्शन बिर्सनलायक भयो। एकल तर्फ नेपाली खेलाडी सक्षम ढकाल भारतका खेलाडी ध्यान सन्तोषसँग २१–८, २१–८ को समान अन्तरमा पराजित भए। यसै गरी सुबिन श्रेष्ठ (बी) भारतका अंश नेगीसँग २१–१०, २१–१२, सुप्रिम पन्त भारतकै साइ रिसवन्त लाडेसँग २१–१६, २१–१७, कबीर के.सी. भारतका दिपांशुसँग २१–१६, २१–१५ ले पराजित भए।
त्रिपुरेश्वरस्थित कभर्डहलमा भएको प्रतियोगिताको महिला एकल राउन्ड अफ ३२ मा रक्षा फगामीले पहिलो सेट जितेर केही खुसी बाँड्न खोजेकी थिइन् तर दोस्रो र तेस्रो सेटमा सम्हालिन नसक्दा पराजयको सामना गर्न पुगिन्। रक्षा बंगलादेशकी जरिना इकवाल मोहनासँग १८–२१, २१–१२, २१–७ ले पराजित भइन्। यस्तै, स्वर्लिन श्रेष्ठ भारतकी हसिनी बर्मा कोन्दुरुसँग २१–१२, २१–७, रिहाना शेरचन भारतकी दिया भिमैयासँग २१–८, २१–९, श्रीया बज्राचार्य भारतकी बरुनी पर्सवालसँग २१–६, २१–१३ पराजित भए।
राउन्ड अफ १६ मा रहेकी दिलाशा राना थाइल्यान्डकी पिमचानोक सुत्तीविरियाकुलसँग २१–१२, २१–६, निभा राई भारतकी इशिता नेगी सँग २१–६, २१–८, टिशा रानी शाक्य थाइल्यान्डकी पिराया वेचावाङ्गसँग २१–९, २१–४ ले पराजित भए।
पुरुष युगलतर्फ अरुण अधिकारी र सौर्य महर्जनको जोडी भारतका भाब्य चाबरा र परम चौधरीको जोडीसँग २१–११, २१–१० र कबीर केसी र सुविन श्रेष्ठ (बी) को जोडी भारतकै सी.लालरामसँग र सौरभ साउसँग २१–१०, २१–१९ ले पराजित हुन पुगे।
महिला युगल तर्फ दिलाशा राना र रिहाना शेरचनको जोडी भारतका अक्षिता मनरल र बर्णप्रभु आनन्दसँग २१–१०, २१–१० को समान अन्तरमा पराजित हुन पुगे। यसै गरी रक्षा फगामी र आस्ना श्रेष्ठको जोडी पनि भारतका खेलाडीसँग पराजित भए। भारतका इशिता नेगी र भान्सिका ठाकुरको जोडीसँग २१–६, २१–५ तथा श्रीया बज्राचार्य र निभा राईको जोडी थाइल्यान्डका सुनिशा लेकजुरा तथा अनन्या नापालाई सँग २१–११, २१–५ ले पराजित भए।
तीन दिने सिरिजमा नेपालसहित भारत, न्युजिल्यान्ड, मलेसिया, थाइल्यान्ड, इरान, युनाइटेड अरब इमिरेट्सका खेलाडीहरूको सहभागिता छन्।
सिरिजमा पुरुष/महिला एकल तथा युगल र मिक्स युगल गरी ५ विधामा ९९ खेलाडीहरूले प्रतिस्पर्धा गरिरहेका छन्। जसमा नेपाली ८ महिला र ८ पुरुष खेलाडीको सहभागिता रहेको छ। पुरुष एकलमा ३२ जना, महिला एकलमा २१ जना, मिक्स युगलमा १७ जोडी, पुरुष युगलमा १८ जोडी र महिला युगलमा १२ जोडीले प्रतिस्पर्धा गर्दै छन्।
