बार्सिलोनाको उपाधि रक्षा अभियानमा सानदार सुरुआत

काठमाडौं। बार्सिलोनाले आइतबार एल्चेलाई ५–० ले पराजित गर्दै ला लिगा उपाधि रक्षा अभियानमा सानदार सुरुआत गरेको छ। लगातार तेस्रो लिग उपाधि जित्ने लक्ष्यमा रहेको बार्सिलोनाका लागि राफिन्हा र फर्मिन लोपेजले दुई–दुई गोल गरे।

कप्तान राफिन्हाले १४औं मिनेटमै पेनाल्टीमार्फत गोल गर्दै बार्सिलोनालाई अग्रता दिलाए। एल्चेका डिफेन्डर भिक्टर चुस्तले पेनाल्टी क्षेत्रमा राफिन्हालाई लडाएपछि प्राप्त पेनाल्टीमा उनले गोलरक्षकलाई कुनै मौका दिएनन्।

पहिलो हाफको इन्जुरी समयमा नयाँ खेलाडी करिम अदेयेमीले बार्सिलोनाका लागि दोस्रो गोल गरे। बार्सिलोनाले मिडफिल्डमै बल खोसेपछि लामिन यमलले राफिन्हालाई बल दिए। राफिन्हाको उत्कृष्ट पासमा अदेयेमीले अफसाइड ट्र्याप तोड्दै गोल गरे।

दोस्रो हाफमा बार्सिलोनाले आफ्नो दबाब अझ बढायो। ६७औं मिनेटमा एन्थोनी गोर्डनले बायाँतर्फबाट तीव्र गतिमा अघि बढ्दै राफिन्हालाई उत्कृष्ट पास दिए, जसलाई उनले शक्तिशाली प्रहारमार्फत गोलमा परिणत गर्दै व्यक्तिगत दोस्रो गोल गरे।

त्यसको चार मिनेटपछि गोर्डन फेरि निर्णायक बने। आफ्नै हाफबाट लामो पास पछ्याउँदै एल्चेको पेनाल्टी क्षेत्रमा पुगेका उनले फर्मिन लोपेजलाई बल मिलाइदिए। फर्मिनले खाली पोस्टमा गोल गर्दै स्कोर ४–० बनाए।

७९औं मिनेटमा फर्मिनले व्यक्तिगत दोस्रो तथा बार्सिलोनाको पाँचौं गोल गरे। पेनाल्टी क्षेत्रको छेउमा बल नियन्त्रण गर्दै डिफेन्डरलाई छक्याएर उनले शक्तिशाली प्रहार गरेका थिए।

बार्सिलोनाका लागि एकमात्र चिन्ताको विषय भने पहिलो हाफको अन्त्यतिर गाभी घाइते हुँदै मैदानबाट बाहिरिनु रह्यो। दायाँ घुँडामा दुखाइ महसुस भएपछि उनले मैदान छाडेका थिए। उनको चोटबारे क्लबले अहिलेसम्म आधिकारिक जानकारी सार्वजनिक गरेको छैन।