एसियन प्यासिफिक करातेमा नेपाललाई ९ पदक

काठमाडौं। सिंगापुरमा सञ्चालन भएको १६ औं एसियन प्यासिफिक सितोरियो कराते प्रतियोगितामा नेपालले २ स्वर्ण, २ रजत र ५ कांस्य गरी कुल ९ पदक जितेको छ। 

नेपालको लागि सिनियर महिलातर्फ ६८ किलो तौल भन्दा माथि समूहमा १९औं एसियन गेम्सकी रजत पदक विजेता एरिका गुरुङले नेपाललाई स्वर्ण पदक दिलाइन्। त्यसैगरी महिलातर्फकै –५० किलो तौल समूहमा अञ्जलि महर्जनले नेपाललाई स्वर्ण पदक दिलाइन्। 

एलिशा रासकोटी मगर, टपी थापा र मेघा लिम्बूले महिला तर्फको टिमकाता र निरुपा दोङ तामाङ्गले सिनियर महिलाको –५५ किलो तौल समूहमा रजत पदक दिलाउन सफल भइन्।

त्यसैगरि सिनियर महिला एकल कातामा एलिशा रासकोटी मगर, महिला जुनियर तर्फ–४५ किलो तौल समूहमा पोरसिया चौधरी, महिलाकै –६८ किलो तौल समूहमा आशिका राई, पुरुष तर्फको १६ वर्ष मुनि एकल कातामा रेहान जावेद र सिनियर पुरुष तर्फ –८४ किलो तौल समूहमा मोहम्मद शेखु आलमले नेपाललाई कांस्य पदक दिलाए।

नेपाल सितोरियो कराते संघका अध्यक्ष दावा गुरुङ हेड अफ डेलिगेटस विशेष नेतृत्व र नेपाल कराते महासंघका अध्यक्ष युवराज लामाको समग्र नेतृत्वमा नेपाली १२ खेलाडी, टिम म्यानेजर, रेफ्री,अफिशियल गरी कुल ३० जना एसियन प्यासिफिक सितोरियो करातेमा सहभागी भएको नेपाल सितोरियो कराते संघका प्रवक्ता गजेन्द्र बहादुर खपाङ्गी ‘ईश्वर’ले जानकारी गराए।

यसै गरी आइतबार एसियन प्यासिफिक सितोरियो करातेको विशेष अधिवेशन (कंग्रेस) मा नेपालको तर्फबाट नेपाल सितोरियो कराते संघका अध्यक्ष दावा गुरुङ र सितोरियो करातेका संरक्षक समेत रहेका नेपाल कराते महासंघका अध्यक्ष युवराज लामाले सहभागी जनाउने छन्। नेपाली कराते टोली सोमबार स्वदेश फर्कनेछ।