सूर्य नेपाल प्रिमियर गल्फ च्याम्पियनसिप मंगलबारदेखि

काठमाडौं। सूर्य नेपाल गल्फ टुर २०२३/२४ को अन्तिम प्रतियोगिता सूर्य नेपाल प्रिमियर गल्फ च्याम्पियनसिप मंगलबारदेखि गोकर्ण गल्फ क्लबमा सुरू हुने भएको छ । ७२ होलको चारदिने प्रतियोगिता शुक्रबारसम्म हुनेछ । 

१५ लाख ५० हजार रुपैयाँ पुरस्कार राशी रहेको प्रतियोगिताको विजेताले दुई लाख ७५ हजार नगद पुरस्कार प्राप्त गर्नेछ । दोस्रो र तेस्रो हुनेले क्रमशः एक लाख ७५ हजार र एक लाख २२ हजार रुपैयाँ प्राप्त गर्नेछन् । यस्तै, चौथो र पाँचौ हुनेलाई एक लाख दुई हजार र ८० हजार रुपैयाँ प्रदान गरिनेछ । २१ गल्फरले नगद पुरस्कार प्राप्त गर्ने गर्ने आयोजकले जनाएको छ ।

पुरस्कार राशीको आधारमा सिजनकै ठूलो प्रतियोगितामा ३७ प्रोफेसनल र ११ एमेच्योर गल्फरको सहभागिता रहने पीजीए नेपालका महासचिव दिपक आचार्यले जानकारी दिए । दुई दिनको खेलपश्चात कट लागु हुनेछ । ३६ होलको समाप्तिमा उत्कृष्ट २१ र टाइमा पर्ने प्रोफेसनल खेलाडीहरूले मात्र अन्तिम दुई दिनको खेलका लागि स्थान बनाउनेछन् । एमेच्योर गल्फरको हकमा पनि कट बनाउन उत्कृष्ट २१ भित्र पर्नुपर्नेछ । 

यो सिजनको अन्तिम प्रतियोगितापश्चात् सिजन अवधिभर कूल पुरस्कार रकम प्राप्त गरेको आधारमा नम्बर एक गल्फरको होडमा अहिले भुवन नगरकोटी सबैभन्दा अगाडि रहेका छन् । उनी धरानका निरज तामाङभन्दा एक लाख १८ हजार ८ सय ७५ रूपैयाँले अगाडि छन् । भुवनले यो सिजनको सात प्रतियोगिता सकिँदा पाँच लाख ६६ हजार ८ सय ७५ रुपैयाँ पुरस्कार कमाएका छन् । उनले यो सिजन सूर्य नेपाल वेस्टर्न ओपन जितेका थिए ।

निरज तामाङ चार लाख ४८ हजारसहित मनि लिडर तालिकामा दोस्रो स्थानमा छन् । उनले यो सिजन सूर्य नेपाल काठमाडौं ओपनको उपाधि जितेका थिए । सूर्य नेपाल म्याच प्ले जितेका दिनेश प्रजापति तीन लाख ७२ हजारसहित तेस्रो स्थानमा छन् । सूर्य नेपाल च्यालेन्ज जितेका रवि खड्का तीन लाख ७२ हजार रुपैयाँसहित चौथो र दुई लाख ६० हजार सात सय २५ रुपैयाँसहित सञ्जय लामा पाँचौं स्थानमा रहेका छन ।

मनि लिडरहरूलाई डिफेन्डिङ च्याम्पियन सुवास तामाङले चुनौती प्रस्तुत गर्ने सम्भावना उच्च छ । एमेच्योर गल्फर रहँदा सुवासले कुल पाँच उपाधि जितेका छन् । यो सिजन प्रो बनेपछि उनको यो घरेलु टुरमा दोस्रो प्रतियोगिता हो । यो सिजन सात मध्ये दुई प्रतियोगिता सूर्य नेपाल सेन्ट्रल ओपन र सूर्य नेपाल एनपिजीए टुर च्याम्पियनसीप जितेका एमेच्योर गल्फर सदभाव आचार्य पनि प्रमुख दाबेदार हुन् । उनले यो सिजन सात प्रतियोगिताको समाप्तिमा कुनै पनि प्रोले भन्दा बढी उपाधि जितेका छन् । 

सूर्य नेपाल प्रिमियर गल्फ च्याम्पियनसीपको प्रो–एम शनिबार हुनेछ । २५ प्रो र १०० एमेच्योर गल्फरको सहभागीता रहनेछ ।