धनगढी। कैलालीको धनगढीमा बिहीबारबाट मुख्यमन्त्री १०औं इन्डो–नेपाल कराते प्रतियोगिता सुरु भएको छ।
नेपाल र भारतका चार सय बढी खेलाडीहरूको सहभागिता रहेको प्रतियोगिताको धनगढी कभर्डहलमा सुदूरपश्चिमका मुख्यमन्त्री दीर्घबहादुर सोडारीले उद्घाटन गरे।
दक्षिण भारत, हरियाणा, दिल्ली, पन्जाब, उत्तराखण्ड, विहार लगायतका ठाउँबाट एक सय बढी विदेशी खेलाडी प्रतियोगिता खेल्न धनगढी पुगेका छन्। नेपालका ३८६ जना खेलाडी सहभागी छन्।
क्याडेड, जुनियर र सिनियरतर्फका खेलहरू खेलाइने आयोजक राष्ट्रिय गोजुरियो कराते दो संघ नेपालले जनाएको छ। संघका प्रकाश चन्दले कोभिडका कारण चार वर्षदेखि रोकिएको १०औं संस्करण अहिले भएको बताए। यस प्रतियोगिताको पहिलो संस्करण २०६२ सालमा धनगढीमा भएको थियो।
चन्दले यो प्रतियोगिताबाट उदाएका खेलाडीहरू राष्ट्रिय पदक विजेतासम्म भएको बताए। जुनियर खेलाडीलाई सिनियरको खेल हेरेर सिक्ने मौका मिल्ने उनले बताए।
विदेशी खेलाडीसँगको प्रतिस्पर्धाले आत्मबल बढ्ने प्रशिक्षक अर्जुन सिंहको भनाइ छ। ‘फरक– फरक ठाउँमा फरक तरिकाले खेलिन्छ, उनीहरूका तरिका सिक्न पाइन्छ,’ उनले भने। उनका चार जना प्रशिक्षार्थी ३० र ५० केजी समूहमा फाइट गर्ने छन्।
भारतको पन्जाबबाट आएका छोरीलाई ल्याएर आएका पूर्वभारतीय सैनिक बलदेव सिंहले यो प्रतियोगितामा आफ्नो छोरीलाई सहभागी गराउन पाउँदा खुसी लागेको बताए। उनकी छोरी ३० केजी समूहमा फाइट गर्दै छन्। उनकी छोरी देवेन्द्रसँग स्थानीय स्तरदेखि राष्ट्रियस्तरसम्म खेलेको अनुभव छ। पहिलो पटक अन्तर्राष्ट्रिय खेल्न उनी नेपाल आएकी हुन्। प्रतियोगिताका लागि एक सय बढी अफिसियल र रेफ्रीहरू धनगढी आएका छन्।
