एमेच्योर सद्भाव शीर्ष स्थानमा, प्रो भुवन पछाडि

काठमाडौँ। एमेच्योर गल्फर सद्भाव आचार्यले सूर्य नेपाल एनपीजीए टूर च्याम्पियनसिपको तेस्रो दिन समग्रमा ११-अन्डर २०५ को उत्कृष्ट स्कोरमा शीर्ष स्थानमा रहन सफल भएका छन्। बुधबार २-अन्डर ७० खेलेका सद्भावले प्रो भुवन नगरकोटीलाई एक स्ट्रोकले पछि पारेका छन्।

भुवनले बुधबार १-अन्डर ७१ मा खेल सकाउँदा समग्रमा १०-अन्डर २०६ सहित दोस्रो स्थानमा रहेका छन्। अन्तिम १८ होलको खेल बाँकी रहँदा उपाधि होडमा सद्भाव र भुवनबीच कडा प्रतिस्पर्धा हुने भएको छ।

समग्रमा ३-अन्डर २१३ को नतिजामा दिनेश प्रजापति र विजय श्रेष्ठ आइन्हाउस संयुक्तरूपमा तेस्रो स्थानमा रहेका छन्। आज दिनकै उत्कृष्ट ४-अन्डर ६८ स्कोर कार्ड बनाएका दिनेश नवौँ स्थानबाट तेस्रो स्थानमा उक्लिएका हुन। विजयले आज १-ओभर ७३ मा खेल सकाए।

बुधबार १-अन्डर ७१ स्कोर बनाउँदा समग्रमा २-अन्डर २१४ सहित नीरज तामाङ पाँचौँ स्थानमा छन्। एमेच्योर राहुल विश्वकर्मा समग्रमा १-ओभर २१७ सहित छैटौँ स्थानमा उक्लिएका छन्। उनले आज ३-अन्डर ६९ को कार्ड तयार पारे।

यसैगरी एमेच्योर टासी छिरिङ र प्रो सञ्जय लामाले समग्रमा २-ओभर २१८ सहित सातौँ स्थान बाँडे। टासीले १-अन्डर ७१ र सञ्जयले इभन-पार ७२ मा बुधबारको खेल पूरा गरे। समग्रमा ३-ओभर २१९ सहित युवराज भुजेल र रवि खड्का संयुक्तरूपमा नवौँ स्थानमा छन्। दुवैले बुधबार ४-ओभर ७६ मा खेल पूरा गरे।

लगातार दुई दिनको संयुक्त लिडर भुवनलाई पछि पार्दै एकल अग्रता बनाउने क्रममा सद्भावले फ्रन्ट नाइन २-अन्डर ३४ मा सकाए। तेस्रो र छैटौँ होलमा बर्डी प्रहार गर्दै फ्रन्ट नाइन बोगीरहित खेले। यसपछि १४औँ होलमा एक शट बचाए पनि १७औँ होलको बोगीले ब्याक नाइन इभन-पार ३६ मा सकाए।

भुवनले राम्रो शुरूआत गर्दै फ्रन्ट नाइन ३-अन्डर ३३ मा पूरा गरे। दोस्रो होलमा एक शट खेर फाले। तर यसपछि चौथो, छैटौँ, सातौँ र नवौँ होलमा बर्डी प्रहार गरे। तर, यो लयलाई भुवनले निरन्तरता दिन सकेनन्। १५औँ र १७औँ होलमा बोगी खेप्दै ब्याक नाइन २-ओभर ३८ मा सकाए।

दिनेशले फ्रन्ट र ब्याक नाइन दुवै २-अन्डर ३४ मा पूरा गरे। चौथो होलको बोगीकाविरुद्ध तेस्रो, सातौँ र आठौँ होलमा बर्डी प्रहार गरे। यसपछि १०औँ र ११औँ होलमा पनि एक-एक शट बचाए।

विजयले फ्रन्ट नाइन इभन-पार ३६ मा सकाउने क्रममा तेस्रो र सातौँ होलमा एक-एक सट बचाए भने पाँचौँ र छैटौँ होलमा बोगी खेपे। ब्याक नाइन भने १-ओभर ३७ मा पूरा गरे। विजयले दशैँदेखि १२औँ होलमा लगातार तीन बर्डीको सफलता प्राप्त गरिसकेका थिए। तर ४-पारको १४औँ होलमा ट्रिपल बोगीको सामना गर्नबाध्य हुँदा १७औँ होलमा एक शट खेर फाले।

कुल ८ लाख ४० हजार नगद पुरस्कार राशि रहेको प्रतियोगिताको विजेताले १ लाख ४० हजार नगद पुरस्कार प्राप्त गर्नेछन्। दोस्रो र तेस्रो हुने गल्फरले क्रमशः ९६ हजार र ७२ हजार नगद हात पार्नेछन्। कट बनाएका २३ प्रो गल्फरमध्ये उत्कृष्ट २१ गल्फरले नगद पुरस्कार प्राप्त गर्नेछन्।