ललितपुर । छैटौं संस्करणको तुल्सिलाल स्मृति राष्ट्रिय क्लब टिम च्याम्पियनसिप बुद्धिचाल प्रतियोगिताको तेश्रो चरणको खेल सकिदाँसम्म आयोजक ललितपुर स्पोर्ट्स क्लब ६ अंकसहित शीर्ष स्थानमा रहन सफल भएको छ ।
नेपाल बुद्धिचाल महासंघ र ललितपुर स्पोर्ट्स क्लबको संयुक्त आयोजना जारी प्रतियोगितामा राजन सुवेदीले सीएम मिलन लामालाई, रिसोन थापाले कुशल बेलबासेलाई र आयुष देमन रौराले रिया श्रेष्ठमाथि जित हासिल गर्न सफल भएका छन् । सरोज महर्जनले भने डिभाइस सातमा राखेर खेल्दा अयोग्य घोषित भई अंक गुमाउन पुगेका छन्।
ललितपुरले यस खेलमा १ कोविरुद्ध ३ जित हासिल गर्दै शतप्रतिशत नतिजा आफ्नो पक्षमा पार्न सफल रह्यो ।
ललितपुर महानगरपालिका चेस टिमले कास्की जिल्ला बुद्धिचाल संघमाथि २ दशमलव ५ ले जित दर्ता गरेको छ ।
ललितपुरका जनार्दन श्रेष्ठले महेश्वर अधिकारीलाई, पुनम प्रसाईले अनिज पोखरेललाई पराजित गरे भने आर्य मुकारुङ र आश्चर्य चौधरीले बराबरी गर्दै ललितपुर टिमलाई महत्वपूर्ण जित दिलाए भने कमल श्रेष्ठ सागल शाईसँग पराजित हुन पुगे ।
अर्को खेलमा मकवानपुर जिल्ला बुद्धिचाल संघले कास्की जिल्ला बुद्धिचाल संलाई पराजित गर्दा सीएम श्रृष्ण थापा, सिन्देश्वर दाश र अनुशा गौतमले जित हात पारेका छन् । सुदेन टुईटुई अरिज पोखरेलसँग पराजित हुन पुगे ।
मख्खन चेस क्लब काठमाडौंले ललितपुर जिल्ला बुद्धिचाल संघलाई शुन्य दशमलव ५ अंकविरुद्ध ३ दशमलव ५ ले पराजित गर्दै महत्वपूर्ण अंक प्राप्त गर्न सफल भएका छन् ।
जसमा ३ पटकका पूर्व नेपाल च्याम्पियन बद्रिलाल नेपालीले कृष्णमान महर्जनलाई, शतिष शाहले कपिल घिमिरेलाई, रियान श्रेष्ठले शुभम यादवमाथि जित निकाले भने आर बज्राचार्य र बाबुराजा महर्जनबीचको खेल बराबरीमा टुङ्गिएको थियो ।
गोदावरी नगरपालिका र कोशी प्रदेश बुद्धिचाल संघबीचको खेल बराबरीमा सकिएको छ ।
गोदावरीका सान्ती धिमालले सजल न्यौपानेलाई पराजित गरिन् । धिरेन राई र प्रकाश चन्द्र नेपाल, अशाक मोहन श्रेष्ठ र सविन चन्द्र घिमिरेबीचको खेल बराबरीमा सकिएका छन् भने सुभव न्यौपाने मिसन दहालसँग पराजित हुन पुगे ।
लिग कम नकआउटका आधारमा जारी प्रतियोगितामा नेपाल भरका शीर्ष क्लबहरु डिफेन्डिङ च्याम्पियन थापाथली चेस पार्क क्लब, ललितपुर स्पोर्ट्स क्लब, लुम्बिनी इभेन्ट म्यानेजमेन्ट टिम, सुदूर पश्चिम खेलकुद विकास परिषद्, दोलखा चेस होम, दोलखा बुद्धिचाल संघ, गण्डकी प्रदेश बुद्धिचाल संघ, कास्की जिल्ला बुद्धिचाल संघ, ललितपुर महानगरपालिका, गोदावरी नगरपालिका, पुल्चोक क्याम्पस र ललितपुर जिल्ला बुद्धिचाल संघ गरि १९ टिम सहभागी छन् ।
प्रतियोगिताका संयोजक राजु ताम्राकारका अनुसार विजेता टिमले नगद पुरस्कार २ लाख, उपविजेताले १ लाख २० हजार, तेस्रो स्थान प्राप्त गर्ने टिमले ६० हजार र चौथो हुने टिमलाई ४० हजार नगद पुरस्कार प्रदान गरिनेछ।
प्रत्येक बोर्डमा प्रथम हुने ४ जना खेलाडीहरुलाई जनही १० हजार पुरस्कारको व्यवस्था गरिएको छ।
प्रतियोगिताको कुल पुरस्कार राशी ४ लाख ७० हजार रहेको छ ।
