काठमाडौं । चौंथो वरियताका जयराम श्रेष्ठलाई हराउँदै डिफेन्डिङ च्याम्पियन दिनेश प्रजापतिले सूर्य नेपाल गल्फ टुर २०२३–२४ अन्तर्गत सिजनको दोस्रो प्रतियोगिता सूर्य नेपाल एनपीजीए म्याच प्लेको उपाधि जित्न सफल भएका छन् ।
रोयल नेपाल गल्फ क्लबमा भएको ३६ होलको फाइनलमा जयराम श्रेष्ठलाई ६/४ ले हराउँदै दिनेश उपाधि रक्षा गर्न सफल भएका हुन् । यो सिजन सानदार सुरूवात गरेका दिनेशको करियरको यो दोस्रो उपाधि हो ।
अनुभवी चौथो वरियताका जयराम र तेस्रो वरियताका दिनेशबीच १८ होलसम्म कडा प्रतिस्पर्धा चलेको थियो । नवौं होलको समाप्तिमा जयराम एक होलले अघि थिए । तर १८ होलको समाप्तिमा दिनेशले खेललाई बराबरीमा पुर्याए।
यसपछि भने दिनेश खेलमा हाबी बने । १९ औं होलमा करिब ३० यार्डबाट दिनेशले बर्डी प्रहार गर्दै एक होलको अग्रता बनाए । २३ औं होलमा जयरामले पार जोगाउन सकेनन् भने दिनेशले पारमा नै यो होल जितेर दुई होलको अग्रता बनाए । खेलमा फर्कन जयरामलाई जित जरूरी थियो । तर यसपछि २४ देखि २७ होल बराबरीमा सकियो ।
२८ औं होलमा पार खेल्दै तीन होलको आरामदायी अग्रता दिनेशले बनाए । दबाबमा परेका जयराम खेलमा फर्कन सकेनन् भने ३१ औं होल पनि दिनेशले नै जित्दा ५ होलको अग्रता बनाए । यसपछि ३२ औं होलमा खराब टी सट हानेसँगै जयरामले हार आत्मसात गर्दा दिनेशले ४ होल अघि नै उपाधि आफ्नो नाममा लेखाए ।
दिनेशले पहिलो चरणमा तोरण विक्रम शाही, क्वाटरफाइनलमा रबि खड्का र सेमिफाइनलमा रामे मगरलाई हराएका थिए । उपाधिसँगै दिनेशले नगद ६० हजार प्राप्त गरेका छन् । दोस्रो भएका जयरामले ४२ हजार हात पारे । दिनेशले सिजनको पहिलो प्रतियोगिता सूर्य नेपाल सेन्ट्रल ओपनमा प्रोफेसनलतर्फ पहिलो स्थान प्राप्त गरेका थिए । जारी टुरमा दुई मध्य दुवै प्रतियोगितामा सानदार प्रदर्शन गर्दै सिजनको सुरूवात उत्कृष्ट गरेका छन् ।
सातौं वरियताका रामे मगरले तेस्रो स्थान प्राप्त गरे । उनले १८ होलको प्रतिस्पर्धामा नवौं वरियताका भुवन कुमार रोक्कालाई १८ औं होलमा हराए । रामेले ३२ हजार र भुवनले २४ हजार पुरस्कार हात पारे ।
कुल २ लाख ५० हजार नगद पुरस्कार राशीको प्रतियोगितामा पहिलो चरणमा पराजित हुने आठ खेलाडीहरूले जनही ६÷६ हजार प्राप्त गरे । क्वाटरफाइनलमा पराजित चार खेलाडीले जनही ११ हजार प्राप्त गरे ।
विजयी खेलाडीहरूलाई सूर्य नेपालका मार्केटिङ म्यानेजर केशव प्रधान, एनपीजीएका अध्यक्ष रविन्द्रमान श्रेष्ठ, आरएनजीसीका अध्यक्ष मधुकर याक्थुम्बा, आरएनजीसीका क्याप्टेन मिथुन राई र आरएनजीसीका कोषाध्यक्ष रोशन श्रेष्ठले पुरस्कार वितरण गरेका थिए ।
