राजश्रीलाई कर्पोरेट सुपर सिक्स क्रिकेटको उपाधि
काठमाडौं । दोस्रो संस्करणको डिसहोम कर्पोरेट सुपर सिक्स क्रिकेट कपको उपाधि राजश्री सेभिङ्ग एण्ड क्रेडिट को–अपरेटिभ सोसाइटी लिमिटेडले जितेको छ ।
सर्लाही सदरमुकाम मलंगवामा आयोजना गरिएको प्रतियोगितामा नबिल बैंकलाई हराउँदै राजश्रीले उपाधि उचालेको हो ।
मलंगवा नगरपालिकास्थित तीनबिघे मैदानमा भएको प्रतियोगितामा राजश्रीले नबिल बैंकलाई ४ विकेटले पराजित गर्यो ।
सुरुवातमा ब्याटिङ गरेको नबिलले निर्धारित ५ ओभरको खेलमा २ विकेट गुमाएर ४५ रन बनाएको थियो । नबिलका लागि मनोज साहले सर्वाधिक १६ रन बनाएका थिए ।
४६ रनको लक्ष्य पछ्याएको राजश्रीले ५ बल अगावै १ विकेट गुमाएर लक्ष्य पुरा गर्यो ।
राजश्रीका लागि अमलेश यादवले सर्वाधिक २२ रन बनाए ।
जितसँगै विजेता राजश्रीले प्रतियोगिताको उपाधि उचाल्यो । विजेता टिमका खेलाडीहरुले तीन सय एमबीपीएसको तीन महिनाको डिसहोमको राउटर सहितको फ्रि नेट प्राप्त गरेका छन् ।
उपविजेता बनेको नबिलका खेलाडी उपाधि सहित तीन महिनाको डिसहोमको राउटर सहितको नेट प्राप्त गरेका छन् ।
कार्यक्रमलाई सम्बोधन गर्दै नगरपालिकाका प्रमुख नागेन्द्र प्रसाद यादवले प्रतियोगितालाई सफल बनाउन सहयोग गरेको मलंगवा क्रिकेट युथ क्लबलाई धन्यवाद दिए ।
उनले क्लबका खेलाडीलाई अभ्यासका लागि तीन वटा पक्की पिच निर्माण गर्ने प्रतिबद्धता जनाए । प्रतियोगितामा ९ वित्तिय संस्था र नगरपालिका गरि १० टिमको सहभागीता रहेको थियो ।
