एन्फा हेडक्वार्टरबाट इन्द्रमानका ५ सन्देश

काठमाडौं । अखिल नेपाल फुटबल संंघ एन्फाका पूर्व महासचिव इन्द्रमान तुलाधरले शनिबार एन्फा हेडक्वार्टर सातदोबाटोमा पत्रकार सम्मेलनको आयोजना गरेर वर्तमान अध्यक्ष पंकज नेम्वाङ्गको कार्यसमितिलाई सहयोग गरेर जाने घोषणा गरेका छन् ।

नेम्वाङ्गको सहकार्यको प्रस्तावलाई स्विकार गर्दै एन्फा हेडक्वार्टर छिर्ने तयारी थालेका तुलाधरले के जिम्मेवारी पाउँछन्, बाहिर आएको छैन । तर उनी प्रमुख कार्यकारी अधिकृत सिईयोको रुपमा लाख बढी तलब लिएर एन्फा फर्कने निश्चित देखिएको छ । पत्रकार सम्मेलनमा उनले एन्फामाथि लाग्दै आएको कन्ट्रोल फन्डिङ र प्रतियोगिता सञ्चालमा सहयोग गर्ने कार्यक्षेत्र प्रस्ट पारिसकेका छन् ।

फुटबलको राजनीतिमा अस्थिर र अवसरवादी चरित्र बनाएका तुलाधरले पत्रकार सम्मेलनमा खुलेर बोले र केही महत्वपुर्ण सन्देश दिएका छन् । जसको प्रभाव नेपालको घरेलु फुटबलमा आगामी दिनमा देखिनेछ । 

१. त्रिकोणात्मक शक्तिको एउटा हिस्सा :

गणेश थापाको बहिर्गमनपछि फुटबलमा कति वटा शक्ति छन् भन्ने अनुमान चल्दै आएको थियो । इन्द्रमानले यसमा प्रस्ट उत्तर दिदै त्रिकोणात्मक शक्तिको कुरालाई पटक पटक दोहो¥याएका छन् । अर्थात एउटा शक्ति वर्तमान अध्यक्ष पंकज नेम्वाङ्ग सहितको समूह, अर्को शक्ति निवर्तमान अध्यक्ष कर्माछिरिङ शेर्पा सहितको समूह र तेस्रो शक्तिको रुपमा उनले आफुलाई सार्वजनीक गरेका छन् । उनका पछाडी को–को छन्, पत्रकार सम्मेलनमा खुलाएनन् । तर उनले आफुलाई एन्फाको तेस्रो शक्तिको रुपमा प्रस्तुत गरेका छन् । 

२. नेम्वाङ्गलाई हटाउन सकिएन :

तुलाधरले प्रस्ट रुपमा नेम्वाङ्गलाई हटाउन खोजेपनि नसकेको प्रस्ट पारेका छन् । नेम्वाङ्गको एक वर्षको कार्यकालको समिक्षा गर्दै अविश्वासको प्रस्तावसम्म पुग्दा वैधानिक रुपमा हटाउन खोजेपनि आफुहरुले नसकेको स्विकार गरेका हुन् । उनले नेम्वाङ्गलाई हटाउन नसकेपछि उनलाई समर्थन गर्ने बिन्दुमा आफु पुगेको बताएका हुन् । 

३. मेरो नेता नेम्वाङ्ग :

तुलाधरले तेस्रो सन्देशको रुपमा आफ्नो अबको नेता नेम्वाङ्ग हुने बताएका छन् । एन्फाभित्रको त्रिकोणात्मक समिकरणमा एउटा पक्षसँग मिल्न आफुले निरन्तर आग्रह गरेको उल्लेख गर्दै उनले आफुसँगको सहकार्य दिर्घकालिन हुने संकेत गरे । ‘हरेक नेतृत्वले दुई कार्यकाल काम गर्न पाउनुपर्छ भन्ने मेरो मान्यता हो । एउटा कार्यकालमा नेतृत्वले चाहेको काम गर्न नसक्ने भएकाले अर्को कार्यकालको अवसर दिनुपर्छ ।’ तुलाधरले भनेका छन् । 

तुलाधरले नेम्वाङ्गलाई दोस्रो कार्यकालमा समेत सहयोग गर्ने गरि आफुले सहकार्यको हात अघि बढाएको बताएका छन् । यसले गर्दा नेम्वाङ्ग र तुलाधरको फुटबल समिकरण दिर्घकालिन रुपमा जाने देखिन्छ ।

४. तलब सहितको भुमिका :

पत्रकार सम्मेलनमा तुलाधरले एन्फामा आफ्नो राम्रो तलब सहितको भुमिका हुने प्रष्ट रुपमा बताएका छन् । कामको रुपमा कन्ट्रोल फन्डिङ र प्रतियोगिता हेर्ने इच्छा देखाएका उनले यसअघि लिदै आएको तलब सुविधा सहितको भुमिकाको अपेक्षा गरेका छन् । एन्फामा महासचिव, कोषाध्यक्ष र प्रवक्ताले मासिक रुपमा तलब लिदै आएका छन् । कर्मचारीको रुपमा मात्र तलब लिन मिल्ने भएकाले एन्फाको प्रमुख कार्यकारी अधिकृत सिईयोको रुपमा तुलाधर आउने देखिन्छ । अन्य भुमिकामा लाख बढी तलब पाउन गाह्रो पनि छ । 

५. नेतृत्व गर्न सक्दिन, जो आउँछ पछि लाग्छु :

पंजक नेम्वाङ्ग असफलताको बाटोमा अघि बढ्दा धेरैले इन्द्रमानलाई विकल्पको रुपमा हेरेका थिए । अविश्वासको प्रस्तावबाट यदी नेम्वाङ्ग हटेको खण्डमा इन्द्रामाननै अघि आउने धेरैको आँकलन थियो । त्यसमाथि एन्फाका पूर्व अध्यक्ष गणेश थापाको सद्भाव इन्द्रमानसँग थियो । नेम्वाङ्गसँग मिल्ने इन्द्रमानको निर्णयपछि उनलाई नेता बनाउन खोज्ने गणेश थापा नराम्ररी बिच्किएका छन् । इन्द्रमानले पत्रकार सम्मेलनमा आफुले नेतृत्व गर्न कोशिश गरेको तर नसकेको स्विकार गरेका छन् । नेतृत्व गर्न नसकेपछि नेम्वाङ्गको पछि लाग्न आफु आईपुगेको उनको कथन छ । 

बजारमा प्रश्न छन्, के इन्द्रमान अवसरवादी हुन् ? उनले आफु फुटबलमा काम गर्न रमाउने मान्छे रहेको बताउँदै जो आएपनि फुटबलमा काम गर्न आफु सधै तयार रहेको बताएका छन् । इन्द्रमानले आफुलाई एन्फाको सदाबहार संस्थापन पक्षको रुपमा सन्देश दिएका छन् ।