काठमाडौं । नेपाल सुपर लिग एनएसएलको नवप्रवेशी क्लब हो, स्पोर्टिङ इलाम । पूर्वको प्रतिनिधित्व गर्दै एनएसएलमा आएको इलामको डेब्यु सिजन सुखद रहेन ।
प्रतियोगिताको दोस्रो संस्करणमा एक खेल बाँकी छँदै इलामको उपाधि सम्भावना समाप्त भएको छ । उसले प्रतियोगिताको सातौं चरणसम्म जति अंक बटुलेको छ, त्यसले उसलाई प्लेअफसम्म अब पुर्याउन सक्दैन । अर्थात शीर्ष चारमै नपुग्ने भएपछि इलामको उपाधि सम्भावना समाप्त भएको छ ।
इलामले पहिलो खेलमा साविक विजेता काठमाडौं रेजर्ससँग १–० ले गुमाएको थियो । दोस्रो खेलमा झापालाई हराउँदै उसले प्रतियोगितामा उत्कृष्ट पुनरागमनको संकेत गरेको थियो । तेस्रो खेलमा उसले जित निकाल्न संघर्ष गरिरहेको बुटवल लुम्बिनीलाई २–१ ले नतिजा सुम्पियो । खेलको अन्तिम समयमा एरिक विष्टले सनसनीपूर्ण फ्रिकिक गोलमा इलाम स्तब्ध बन्नुको विकल्प रहेन ।
चौथों खेल पोखरासँग १–० ले गुमाएको इलामले पाँचौं खेलमा धनगढीविरुद्ध प्राप्त २–० को अग्रतालाई जोगाउन सकेन र अन्तिममा अंकनै बाड्यो ।
लिगको छैटौं खेल पुछारको टिम बिरगञ्ज युनाईटेडसंग २–१ ले गुमाएपछि इलामले धेरै सम्भावनालाई लगभग बन्द गरिसकेको थियो । शनिबार चितवनसँग गोल रहित बराबरी खेलेपछि गणितिय रुपमा शीर्ष चारमा पुग्न इलामको सम्भावना सकिएको छ ।
इलामले ७ खेलमा १ जित, २ बराबरी र ४ हारको नमिठो नतिजा ब्यहोर्यो । इलाम एक खेल खेल्न बाँकी छदाँ ५ अंक सहित तालिकाको पुछारमा छ । उसले लिगको अन्तिम खेल उपाधिको दाबेदार मानिएको ललितपुर सिटी एफसीसँग खेल्नेछ ।
प्रतियोगिता सुरु हुन अघि इलामलाई बलियो प्रत्यासीको रुपमा हेरिएको थियो । यसको मुख्य कारण प्रशिक्षक मेघराज केसीनै हुन् । घरेलु फुटबलका सफल प्रशिक्षक केसीको नेतृत्वमा इलामले कम्तिमा सुपर फोर खेल्ने सबैको अपेक्षा थियो । टिममा खेलाडी पनि कमजोर थिएनन् । केही स्वदेशी र केही विदेशी खेलाडीको राम्रो संयोजन गरेको इलामले राम्रो चुनौती पेश गर्ने धेरैको अपेक्षा थियो ।
तर नतिजा उसको अनुकुल आएन ।
प्रशिक्षक मेघराज केसीले पनि भने, ‘खेल राम्रो छ । प्रर्दशन गरेकै छौं । यत्ति हो, गोल निस्किएको छैन ।’
गोल नआएपछि जित निक्लने कुरा नि भएन ।
इलामको खेललाई नतिकबाट हेरिरहेका एक जना खेल विश्लेषकले भने, ‘खेलाडीले उत्साहका साथ खेल्न सकेनन् । उनीहरुमा जितको भोक देखिदैन ।’ ‘मैदानको मेची’को नारा लिएर एनएसएलमा आएको पहिलो सिजनमा इलामले खराब अनुभव बटुलेको छ ।
मेघराज आफैका लागि एनएसएल सुखद रहेन । पहिलो सिजन चितवनबाट पुछारमा बसेका उनी यस सिजन समेत इलामबाट अन्तिममै रहने देखिन्छ ।
