समर्थकलाई धनगढीका खेलाडीसँग लन्चको अवसर 

काठमाडौं । नेपाल सुपर लिगको क्लब धनगढी एफसीले आफ्ना समर्थकलाई खेलाडीसँग लन्चको अवसर प्रदान गर्ने भएको छ । 

क्लबले सामाजिक सञ्जालमार्फत खेलको अनुमान सहि मिलाउने ६ जना खेलाडीलाई आफ्ना स्टार खेलाडीसँग लन्चसँगै भलाकुसारी गराउने भएको हो । 

धनगढीले यसअघि भएको चितवन एफसीसँगको खेलबाट छनौट भएका ३ जना र शनिबार हुने ललितपुर सिटी एफसीसँगको खेलको सही अनुमान लगाउने ३ जना गरि जम्मा ६ जना दर्शक, समर्थकलाई खेलाडीसँग लन्चको अवसर दिने भएको हो ।

 समर्थक र क्लबबीचको आत्मियता बढाउन र समर्थकको सम्मानका लागि यो कार्यक्रम आयोजना गरिएको क्लबका प्रमुख कार्यकारी अधिकृत सिइयो सकुस केसीले जनाए । 

धनगढीले आफ्नो अफिसियल फेसबुक पेजमा हुने क्विज तथा अनुमान मिलाउन दर्शकलाई निशुल्क टिकट पनि दिएको छ । 

धनगढी जारी एनएसएलमा लगातार दुई खेल जित्दै शीर्ष स्थानमा छ । धनगढीले पहिलो खेलमा वीरगञ्ज यूनाइटेड एफसीलाई २-१ र चितवन एफसीलाई १-० ले पराजित गरिसकेको छ । धनगढी यसअघिको संस्करणको उपविजेता टोली पनि हो ।

समर्थकहरुले गोलरक्षक मोहम्मद ताहासँगै नेपाली घरेलु फुटबलका सर्वाधिक सफल विदेशी स्टार स्टाइकर ओलाआले अफिज, पहिलो खेलमै सिजनै सर्वाधिक छिटो गोल गर्ने फोडे फोफना, स्ट्राइकर अहमद हिजाजी, यूरोपियन लिगको ठूलो अनुभव बटुलेका डिग्ने फलउ र रिचार्ड ओसाउ, कप्तान देवेन्द्र तामाङ र आशिष चौधरीलगायत टोलीका सदस्यसँग लन्चको अवसर पाउँनेछन् ।