काठमाडौं । फ्रेन्चाइज फुटबल नेपाल सुपर लिग (एनएसएल)को दोस्रो संस्करण शुक्रबार साँझबाट सुरु हुदैछ ।
चौधरी समूह संलग्न रहेको नेपाल स्पोर्टस एण्ड इभेन्ट म्यानेजमेन्ट कम्पनीको आयोजनामा सुरु हुन लागेको दोस्रो संस्करणको सम्पुर्ण खेल काठमाडौंको दशरथ रंगशालामा हुनेछ ।
दुई वर्षअघि कोभिड महामारीको निकै कठिन समयमा सुरु भएको एनएसएलले दोस्रो संस्करणमा केही फरक दर्शकले अनुभुती गर्न पाउने आयोजकले बताएको छ । आयोजकले बताए अनुसार दोस्रो संस्करणका ५ नयाँ प्रयोगलाई यहाँ प्रस्तुत गरिएको छ ।
चियरलिडर्स
विशेष गरि क्रिकेट खेलमा देखिदै आएको चियरलिडर्स यस पटक एनएसएलमा देखिनेछन् । आयोजकले बताए अनुसार चियरलिडर्सको उपस्थितीले दर्शक र उपस्थित टिमलाई उर्जा र मनोरञ्जन प्रदान गर्नेछ । चियरलिडर्सले कम्मर मर्काउदै हात हल्लाएको दृष्य फुटबलमा दर्शकले पहिलो चोट देख्न पाउनेछन् ।
डिजिटल रनिङ स्क्रिन
खेलमा मात्र हैन, खेल आयोजनामा समेत नेपालको स्तर धेरै तल छ । फुटबलमा अझ बिजोग । तर यस पटक आयोजकले दशरथ रंगशालामा डिजिटल रनिङ बोर्ड राख्नेछ । प्रतियोगिताका बिज्ञापन खेलाडीसँगै डिजिटल स्क्रिनसँग दौडिनेछन् ।
यसको प्रयोगबाट फुटबल खेलको आयोजनामा नयाँ प्रयोग देख्न पाईनेछ । यस्तै यस्तै तत्वले न हो, खेल आयोजनाको स्तर र आकर्षण बढाउने ।
दर्शकको उपस्थिती
कोभिड महामारीका कारण बन्द रंगशालामा आयोजना गरिएको एनएसएलको दोस्रो संस्करणमा दर्शकको उपस्थिती रहनेछ । एनएसएलले नेपाली फुटबलमा फ्यान कल्चरको विकास गर्ने र दर्शकलाई रंगशाला फर्काउने मुख्य योजना रहेको जनाएको छ ।
दर्शकको उपस्थितीले प्रतियोगितामा रोमाञ्चकतामात्र थप्ने छैन, आयोजकको गोजीमा केही पैसा पनि भर्नेछ । त्यही स्रोतबाट उपाधि विजेता टिमले पाउने रकमको टुङ्गो लगाउनेछ । कम्तीमा उपाधि विजेताले ७० लाख पाउने छलफल छ, दर्शकको उपस्थिती राम्रो भएमा पुरस्कार रकम १ करोडसम्म पुग्ने आयोजकले बताएको छ ।
विदेशी खेलाडीको कोटा थप
नेपालमा हुने हरेक फुटबल प्रतियोगिताको नतिजा विदेशी खेलाडीको प्रर्दशनमा निर्भर हुन्छ । एनएसएलले खेलको स्तर वृद्धि गर्न यस पटक ६ विदेशी खेलाडी राख्ने सुविधा दिएका छ । एउटा खेलमा ५ विदेशी खेलाडी खेल्न पाउँछन् ।
यसरी राम्रा विदेशी खेलाडीको संख्या बढ्दा खेलको स्तर बढ्ने अपेक्षा गरिएको छ ।
यस पटक क्लबहरुले केही राम्रा खेलाडी विदेशबाट ल्याएका छन्, केहीले नेपालमै खेल्दै आएका विदेशीबाट राम्रा खेलाडी छानेका छन् । आएका र छानिएका राम्रा विदेशी खेलाडीमा नेपाली माटोका खेलाडी मिसाउँदा खेलको स्तर कस्तो देखिएला ? त्यसका लागि एनएसएल प्रतिक्षित बनेको छ ।
नयाँ ३ टिम
यस पटक एनएसएलको दोस्रो संस्करणमा तीन नयाँ टिम थपिएका छन् । नेपाली फुटबलमा भेगिय हिसाबले पूर्वको योगदान धेरै छ । तर पहिलो संस्करणमा विराटनगर भन्दा पूर्व एनएसएल पुग्न सकेन । दोस्रो संस्करणमा एनएसएल झापा मात्र पुगेको छैन, इलामनै छोएको छ ।
यस पटक झापा एफसी, स्पोर्टिङ इलाम र विरगञ्ज युनाईटेडले आफ्नो चुनौती एनएसएलमा पेश गर्नेछन् । नयाँ टिमको आगमनले एनएसएलको भब्यता र समेट्ने क्षेत्रमा बढोत्तरी हुने अपेक्षा गरिएको छ ।
