काठमाडौं । एसियन गेम्स अन्तर्गत महिला कबड्डीमा नेपाली टिम भारतसँग पराजित भएको छ । शुक्रबार सेमिफाइनलको खेलमा नेपालको महिला कबड्डी टिम भारतसँग ६१–१७ ले पराजित भएको हो ।
जित सहित भारत फाइलन प्रवेश गरेको छ । नेपाल भने सेमिफाइनलमा पराजित हुँदै काँस्यमा सिमित बनेको छ ।
समूह चरणमा बंगलादेशलाई हराएर नेपालले काँस्य पदक सुनिश्चित गरेको थियो । सेमिफाइनलमा भारतलाई हराउँदै अघि बढ्ने अवसर नेपाललाई थियो । तर एसियाली कबड्डीको पावर हाउस मानिने भारत समक्ष नेपालको प्रर्दशन र नतिजा राम्रो रहन सकेन ।
कबड्डीमा सेमिफाइनलमा पराजित हुने दुई टिमलाई संयुक्त रुपमा काँस्य पदक प्रदान गरिन्छ । सोही अनुसार नेपालले काँस्य पदक प्राप्त गरेको हो ।
चीनमा जारी एसियन गेम्समा कबड्डीले पहिलो पदक नेपाललाई दिलाएको हो । योनै हान्जाओ एसियाडमा नेपालले प्राप्त गरेको पदक हो ।
नेपालको महिला कबड्डी टिम एसियन गेम्समा पहिलो पटक सहभागी भएको हो । पहिलो सहभागीतामै कबड्डीले एसियाडमा ऐतिहासिक पदक जित्न सफल भएको छ ।
अब नेपालले कराँते र क्यानोइङमा पदकको आश गरेको छ ।
