काठमाडौं । सूर्य नेपाल गल्फ टुर २०२२-२३ अन्तर्गतको पाँचौ प्रतियोगिता, सूर्य नेपाल सेन्ट्रल ओपनको तेस्रो दिन नेपाल नम्बर एक गल्फर शुक्र बहादुर राई शीर्ष स्थानमा कायमै रहन सफल भएका छन्।
३-अन्डर ६९ मा तेस्रो दिनको खेल सकाउँदा समग्रमा २१ अन्डर १ सय ९५ को स्कोरका साथ उनी शीर्ष स्थानमा रहन सफल भएका हुन् । उनले दोस्रो स्थानमा रहेका भुवन नगरकोटीलाई ६ स्ट्रोकले पछि पार्दै उपाधि रक्षा गर्ने सम्भावनालाई समेत बलियो बनाएका छन्।
इभन-पार ७२ सहित समग्रमा १५-अन्डर २ सय १ सहित भुवन दोस्रो तथा युवा एमेच्योर खेलाडी सदभाव आचार्यले ८-अन्डर ६४ को उत्कृष्ट स्कोरमा समग्रमा ११ अन्डर २ सय ५ को स्कोरमा तेस्रो स्थानमा छन्। नेपाल नम्बर एक एमेच्योर खेलाडी सुबाश तामाङ ६-अन्डर ६६ खेल्दै समग्रमा ७-अन्डर २ सय ९ मा चौथो स्थानमा छन्।
यसैगरी जयराम श्रेष्ठले ३-अन्डर ६९ मा दिनको खेल सकाउँदै समग्रमा ४-अन्डर २ सय १२ को नतिजामा पाँचौ स्थानमा रहे। ३-अन्डर ६९ खेलेका शिवराम पौडेल समग्रमा १-अन्डर २ सय १५ मा छैटौं स्थानमा छ्न्।
प्रोफेसनल गल्फर्स एसोसिएसन नेपालको आयोजना र सुर्य नेपाल प्रा लिको प्रायोजनमा जारी प्रतियोगितामा समग्रमा इभन-पार २ सय १६ को स्कोरमा सञ्जय लामा र निरज तामाङले संयुक्तरुपमा सातौं स्थान बाँडे। टंक बहादुर कार्की समग्रमा २-ओभर २ सय १८ सहित नवौं स्थानमा र कूल ४-ओभर २ सय २० सहित दिनेश प्रजापति क्रमश नवौं र दशौं स्थानमा छन्। दुवैले आज इभन-पार ७२ मा खेल सकाए।
अघिल्लो दिन ११-अन्डर ६१ को नयाँ कोर्ष रेकर्ड कायम गरेका शुक्रले आज फ्रन्ट नाइन २-अन्डर ३४ मा सकाए। उनले तेस्रो र सातौं होलमा बर्डी प्रहार गरे। यसपछि ११औं होलमा बोगी खेपे पनि १०औं र १२औं होलमा एक-एक सट बचाउदै ब्याक नाइन १-अन्डर ३५ मा पुरा गरे। पहिलो दिन ७-अन्डर, दोस्रो दिन ११-अन्डर र तेस्रो दिन ३-अन्डरको लोभलाग्दो नतिजामा शुक्रले उपाधि रक्षा गर्ने सम्भावनालाई बलियो बनाए। अन्तिम १८ होलको खेल बाकी छदा उनले ६ स्ट्रोकको स्पष्ट अग्रता बनाइसकेका छन्।
पहिलो र दोस्रो दिन अन्डर-पार खेलेका भुवनले आज फ्रन्ट र ब्याक नाइन दुबैमा इभन-पार ३६ खेले। तेस्रो होलमा एक सट बचाए पनि चार-पारको चौंथो होलमा डबल बोगी खेपे। सातौं होलमा बर्डी प्रहार गर्दै फ्रन्ट नाईन सकाए। यसपछि १०औं र १४ औं होलमा बोगीको सामना गरे भने ११औं र १७औं होलमा बर्डी खेले।
राष्ट्रिय टिमका सदस्य युवा गल्फर सदभाव आचार्यले ८-अन्डर ६४ को दिनकै उत्कृष्ट स्कोर कार्ड बनाउने क्रममा फ्रन्ट नाइनमा ४-अन्डर ३२ खेले। उनले तेस्रो, चौथो, छैटौं र सातौं होलमा बर्डीको सफलता प्राप्त गरे। बोगी रहित खेल्ने क्रममा सदभावले ब्याक नाइन पनि ४-अन्डर ३२ मा नै सकाए। उनले १०औं देखि १२औं होलसम्म लगातार तीन र १७ औं होलमा एक बर्डी प्रहार गरे। ८-अन्डरको स्कोर सदभावको करियरकै उत्कृष्ट प्रदर्शन हो।
नेपाल नम्बर एक एमेच्योर खेलाडी सुवासले पनि बोगी रहित ६-अन्डरको कार्ड बनाउने क्रममा फ्रन्ट नाइन र ब्याक नाइन समान ३-अन्डर ३३ मा पुरा गरे। उनले तेस्रो छैटौ, सातौ, १२औं, १३औं र १४औं होलमा एक-एक सट बचाए।
कुल ८ लाख नगद पुरस्कार राशीको प्रतियोगितामा ३१ प्रोफेसनल र ९ एमेच्योर खेलाडीले प्रतिस्पर्धा गरिरहेका छन्।
