काठमाडौं । छैटौं संस्करणको केएनपी राष्ट्रिय महिला भलिबल प्रतियोगिता माघ २१ गतेबाट सुरु हुने भएको छ ।
आयोजक शेरबहादुर खड्का स्मृति प्रतिष्ठानले बुधबार पत्रकार सम्मेलनको आयोजना गर्दै प्रतियोगिता माघ २१ देखि २४ गतेसम्म हुने जनाएको छ ।
त्रिपुरेश्वरस्थित राष्ट्रिय खेलकुद परिषद्को कभर्डहलमा सञ्चालन हुने प्रतियोगितामा ६ महिला टोलीको सहभागिता हुनेछ।
यस पटक साविक विजेता सशस्त्र प्रहरी बलको एपीएफ क्लब, न्यु डायमन्ड युथ स्पोर्टस क्लब, नेपाल पुलिस क्लब, त्रिभुवन आर्मी क्लब, गण्डकी प्रदेश भलिबल संघ र एभरेष्ट भलिबल क्लबले सहभागिता जनाउने छन् ।
नेपाल भलिबल संघको प्राविधिक सहयोगमा आयोजना हुने प्रतियोगिताका सहभागी टोलीलाई दुई समूहमा विभाजन गरी लिगकम नकआउटका आधारमा खेलाईनेछ ।
प्रतियोगिताको विजेताले ३ लाख रुपैयाँ पुरस्कार पाउने छन् । यस्तै उपविजेताले एक लाख ५० हजार र तेस्रो हुने टोलीलाई ७५ हजार रुपैया नगद पुरस्कार प्रदान गरिने आयोजकले जनाएको छ ।
प्रतियोगिताका सर्वोत्कृष्ट खेलाडीलाई नगद ५० हजारसंगै अन्य आकर्षक पुरस्कार प्रदान गरिनेछ । विधागततर्फ उत्कृष्ट हुनेलाई जनही १५ हजार र हरेक खेलको प्लेयर अफ दी म्याचलाई १० हजार रुपैयाँ नगद पुरस्कार प्रदान गरिनेछ ।
यस्तै एक नयाँ खेलाडीलाई नगद १५ हजारसहित इमर्जिङ प्लेयर अवार्डबाट सम्मानित गरिनेछ । यसैगरी छैटौं संस्करणको उद्घाटनका अवसरमा एक जना राष्ट्रिय खेलाडीलाई नगद ५० हजार रुपैयाँसहित स्पेसल अवार्डबाट सम्मानित गरिने आयोजकले जनाएको छ ।
केएनपी नेरोलेकसँग सम्झौता
यस्तै आयोजक शेरबहादुर खड्का स्मृति प्रतिष्ठानले बहुराष्ट्रिय पेन्ट कम्पनी केएनपी नेरोलेकसँग मुख्य प्रायोजनको सम्झौता गरेको छ । केएनपी नेरोलेकका कन्ट्री हेड मनोज मिश्र र प्रतिष्ठानकी संरक्षक गमली खड्काले सम्झौतामा हस्ताक्षर गरे ।
केएनपी नेरोलेकका कन्ट्री हेड मिश्रले सामाजिक उत्तरदायित्वअन्तर्गत प्रतिष्ठानसँग सहकार्य गर्दै आएको बताए । उनले प्रतिष्ठानका कार्यक्रमका लागि आगामी दिनमा पनि निरन्तर सहकार्य गर्न तत्पर रहेको बताए ।
नेपाल भलिबल संघका अध्यक्ष जितेन्द्रबहादुर चन्दले नेपाली भलिबललाई व्यवसायिक बनाउने योजना अनुरुप प्रतिष्ठानले काम गर्दै आएको बताए । नेपाली भलिबल व्यवसायिक भएमा त्यसको प्रत्यक्ष फाइदा खेलाडीले पाउने चन्दले बताए ।
-1732631466.jpeg)
