काठमाडौं । नवौं राष्ट्रिय खेलकुद अन्तर्गतको भलिबल खेलमा दर्शकको उपस्थिती उल्लेख्य देखिएको छ । राष्ट्रिय खेलकुदको महिला भलिबल म्याग्दीको बेनी र पुरुष भलिबल पोखरा रंगशालामा भैरहेको छ ।
नवौं राष्ट्रिय खेलकुदको स्रोत परिचालन उप समितिले पोखराको पुरुष भलिबल र पुरुष फुटबलमा टिकट काटेर खेल हेर्ने व्यवस्था मिलाएको छ । दर्शकबाट उठेको पैसा राष्ट्रिय खेलकुद परिषद् (राखेप)को खातामा जम्मा हुनेछ ।
नवौं राष्ट्रिय खेलकुदका अन्य खेलमा दर्शकको उपस्थिती न्युन देखिएपनि भलिबलमा भने उल्लेख्य चाप देखिएको छ । पुरुष भलिबलको टिकटबाट मात्र बुधबारसम्म १० लाख बढीको आम्दानी भएको छ । बिहीबार फाइनलमा अझ बढी दर्शकको उपस्थिती रहने देखिएको उपसमितिका संयोजक सुर्यलाल भण्डारीले खेलपाटीलाई बताए ।
‘तुलनात्मक रुपमा भलिबलमा दर्शकको उपस्थिती धेरै छ । टिकट शुल्क नराखेको भए थेग्नै गाह्रो हुने रहेछ ।अहिलेसम्म पुरुष भलिबलबाट मात्र १० लाख बढीको आम्दानी भएको छ ।’ भण्डारीले भने ।
पुरुष भलिबल अन्तर्गतका खेल हेर्न १ सय र दुई सय टिकट दर तोकिएको छ । फाइनलको दिन २ सय र तीन सयको टिकट दर राखिएको छ ।
‘समापन समारोह समेत भएका कारण पुरुष फुटबलको फाइनलमा दर्शकसँग शुल्क नलिने भन्नेछ । समापनमा सबैलाई सहभागी गराउने उद्धेश्य छ । सोही कारण फुटबलको फाइनलमा टिकट हुदैन । तर भलिबलमा भने टिकटको ब्यवस्था गरिएको छ ।’ भण्डारीले भने ।
खेलकुदलाई ब्यवसायीक बनाउने उद्धेश्य सहित राष्ट्रिय खेलकुदको नवौं संस्करणका केही निश्चित खेलमा टिकटको व्यवस्था गरिएको छ । खेलकुदको नगरी मानिने पोखरामा खेलप्रेमी दर्शकहरुले भलिबल खेललाई राम्रो साथ दिएका छन् ।
तर प्रतियोगिता सञ्चालनको जिम्मेवारी पाएको नेपाल भलिबल संघको कमजोर ब्यवस्थापनका कारण खेलाडीहरु घाइते हुने क्रम जारी छ ।
