नवौं राष्ट्रिय : पुरुष भलिबलको सेमिफाइनल समिकरण पूरा 

पोखरा । नवौं राष्ट्रिय खेलकुद प्रतियोगिता अन्तर्गत पुरुष भलिबलमा गण्डकी प्रदेश सेमिफाइनल प्रवेश गरेको छ ।

पोखरा रंगशालास्थित कोर्टमा मंगलबार भएको अन्तिम क्वाटरफाईनल खेलमा गण्डकीले प्रदेश नम्बर एकलाई पराजित गरेको हो । गण्डकी ३–० को सोझो सेटमा जित निकालेको हो ।

पहिलो सेट २५–२० ले आफ्नो पक्षमा पारेको गण्डकीले दोस्रो सेट २५-२१ ले जितेको थियो । तेस्रो सेटमा गण्डकीले २५-१३ ले जितेर अन्तिम चारमा आफ्नो स्थान पक्का गरेको हो ।

गण्डकीले मंगलबारनै भएको तेस्रो क्वाटरफाईनलको बिजेता नेपाल एपीएफसँग सेमिफाइनलमा खेल्नेछ । प्रदेश एक भने प्रतियोगिताबाट बाहिरिएको छ।

बुधबार दुई सेमिफाईनल खेल हुनेछ । पहिलो सेमिफाईनलमा नेपाल पुलिस क्लब र त्रिभुबन आर्मी क्लब खेल्नेछन् । दोस्रो सेमिफाईनलमा गण्डकी प्रदेश र नेपाल एपीएफ क्लब खेल्नेछ ।

प्रतियोगिताको फाईनल भने बिहिबार हुनेछ ।