भोजिन्हाले पाउलान् उपनाम राख्न ?

चिलीको प्रसिद्ध फुटबल क्लब कोलो-कोलोले आफ्नो नयाँ गोलरक्षक भोजिन्हालाई डेब्यु खेलमा जर्सीमा उनको लोकप्रिय उपनाम प्रयोग गर्न अनुमति दिन चिली फुटबल अधिकारीहरूसँग आग्रह गरेको छ। तर, चिलीको लिग नियमअनुसार खेलाडीले जर्सीमा आफ्नो उपनाम प्रयोग गर्न पाउँदैनन्।

४० वर्षीय केप भर्डेका गोलरक्षक भोजिन्हाले विश्वकपमा उत्कृष्ट प्रदर्शन गर्दै अन्तर्राष्ट्रिय रूपमा चर्चा कमाएका थिए। त्यसपछि उनी इन्स्टाग्राममा पनि निकै लोकप्रिय बनेका थिए। अब उनी कोलो-कोलोसँग प्रारम्भिक रूपमा ६ महिनाको सम्झौता गर्न लागेका छन्।

चिलीको लिग नियममा खेलाडीको जर्सीको पछाडि पितृ वा मातृ थर मात्र राख्नुपर्ने व्यवस्था छ। आवश्यक परे पहिलो नामको पहिलो अक्षर वा दोस्रो थर थप्न सकिने भए पनि उपनाम प्रयोग गर्न निषेध गरिएको छ।

यद्यपि, विगतमा केही विशेष अवस्थामा अपवादस्वरूप अनुमति दिइएको उदाहरण भएकाले कोलो-कोलोले पनि भोजिन्हाका लागि त्यस्तै छुटको अपेक्षा गरेको छ।

क्लबका अध्यक्ष अनिबाल मोसाले आफूले चिली राष्ट्रिय व्यावसायिक फुटबल संघका पदाधिकारीसँग यस विषयमा छलफल गरेको र अन्य क्लबका अध्यक्षहरूले पनि सकारात्मक प्रतिक्रिया दिएको बताएका छन्। उनका अनुसार विश्व फुटबलकै सबैभन्दा ठूलो प्रतियोगिता विश्वकपमा ‘भोजिन्हा’ नामबाट खेलेकाले उनलाई यही नाम प्रयोग गर्न दिनुपर्ने आधार बलियो रहेको छ।

भोजिन्हाको वास्तविक नाम जोसिमार जोजे एभोरा डायस हो। ‘भोजिन्हा’ पोर्चुगाली भाषाको शब्द हो, जसको अर्थ ‘सानो हजुरआमा’ हुन्छ। बाल्यकालमा सडक फुटबलमा हार्दा उनी रूँदै आफ्ना हजुरबुवा–हजुरआमाको घर फर्कने गर्थे। त्यही कारणले साथीहरूले उनलाई यो उपनाम दिएका थिए।

भोजिन्हा बिहीबार सान्टियागो पुग्ने अपेक्षा गरिएको छ। उनको सम्झौतामा थप १२ महिनाका लागि अवधि बढाउने विकल्प पनि समावेश गरिएको छ। पोर्चुगलको दोस्रो डिभिजन क्लब चाभेसबाट आएका भोजिन्हाले यसअघि अंगोला, साइप्रस, मोल्डोभा र स्लोभाकियाका विभिन्न क्लबबाट पनि व्यावसायिक फुटबल खेलेका छन्।