चम्किएका सन

काठमाडौं। दक्षिण कोरियाली स्टार सन ह्युङ–मिनले उत्कृष्ट प्रदर्शन गर्दै दुई गोल गरेपछि एमएलएस अल स्टार्सले लिगा एमएक्स अल स्टार्सलाई ४–३ ले पराजित गरेको छ।

बैंक अफ अमेरिका स्टेडियममा ३५ हजार १९७ दर्शकमाझ सम्पन्न खेलमा सनले पहिलो हाफमै तीन मिनेटको अन्तरमा दुई गोल गर्दै टोलीलाई जिततर्फ डोर्‍याए। दुवै गोलका लागि कार्लेस गिलले असिस्ट प्रदान गरेका थिए।

दुवै गोलपछि सनले आफ्नो चर्चित ‘क्यामेरा सेलिब्रेसन’ गर्दै खुसी साटेका थिए। उत्कृष्ट प्रदर्शनका लागि उनी खेलको मोस्ट भ्यालुएबल प्लेयर घोषित भए।

खेलपछि सनले भने‚‘मेरो वरिपरि उत्कृष्ट खेलाडीहरू थिए, जसले मेरो काम सहज बनाइदिए। दुई गोल गर्न पाउनु आजको रातलाई अझ विशेष बनायो।’

एमएलएसका फिलिप जिन्करनागेल र एभान्डर दा सिल्भा फेरेराले पनि एक–एक गोल गरे। खेलको १०औं मिनेटमा लुइस गाब्रिएल रेयले हेडरमार्फत गोल गर्दै लिगा एमएक्सलाई अग्रता दिलाएका थिए।

तर‚ त्यसपछि सनले २०औं मिनेटमा बराबरी गोल गरे र त्यसको केही मिनेटमै दोस्रो गोल गर्दै एमएलएसलाई अग्रता दिलाए। ४२औं मिनेटमा जिन्करनागेलले रिबाउन्डमा गोल गर्दै पहिलो हाफ ३–१ को अवस्थामा पुर्‍याए।

दोस्रो हाफको सुरुआतमै सलोमन रोन्डोनले गोल गर्दै लिगा एमएक्सलाई ३–२ मा ल्याए। तर‚ ५८औं मिनेटमा फेरेराले गोल गर्दै एमएलएसलाई पुनः दुई गोलको अग्रता दिलाए। इन्जुरी समयमा होसे पार्डेलाले अर्को गोल गरे पनि लिगा एमएक्स हार टार्न सकेन।

मेसी अनुपस्थित

इन्टर मियामीका कप्तान लिओननल मेसी यस खेलमा सहभागी भएनन्। अर्जेन्टिनाले विश्वकपमा फाइनलसम्मको लामो यात्रा तय गरेकाले उनलाई विश्राम दिइएको थियो।

मेसी र उनका टोलीका सहकर्मी रोड्रिगो डे पाउललाई मेजर लिग सकर (एमएलएस) ले आधिकारिक रूपमा अनुपस्थित रहने अनुमति दिएको थियो।