नवौं राष्ट्रिय : पुरुष भलिबलमा पुलिस समूह विजेता

पोखरा । नवौं राष्ट्रिय खेलकुद प्रतियोगिता अन्तर्गत पुरुष भलिबलमा विभागिय टोली नेपाल पुलिस क्लब अपराजित रहँदै समूह बिजेता बन्दै क्वाटरफाईनलमा प्रवेश गरेको छ ।

लगातार दोस्रो जित निकाल्ने क्रममा पुलिसले लुम्बिनी प्रदेशलाई पराजित गरेको हो । शनिबार पोखरा रंगशालास्थित कोर्टमा भएको खेल पुलिसले ३–० को सोझो सेटमा जितेको हो ।

पहिलो सेट २५–१२ ले आफ्नो पक्षमा पारेको पुलिसले दोस्रो सेट २५-८ ले जितेको थियो । तेस्रो सेट २५-२१ ले जित हात पारेर पुलिसले अन्तिम आठमा आफ्नो स्थान पक्का गरेको हो । यस समूहबाट क्वाटरफाईनल पुग्ने अर्को टोलीको टुङ्गो भने आईतबार हुने लुम्बिनी प्रदेश र कर्णाली प्रदेशको खेल पछि लाग्ने छ ।

लिग कम नकआउटको आधारमा भईरहेको प्रतियोगितामा पुलिसले शतप्रतिशत जितसँगै ६ अंक जोडेको छ । सहभागी ११ टिमलाई चार समूहमा विभाजन गरिएको छ ।

समूह 'ए' मा नेपाल पुलिस क्लब,कर्णाली प्रदेश र लुम्बिनी प्रदेश समूह ‘बी’ मा त्रिभुवन आर्मी, प्रदेश १ र मधेस प्रदेश, समूह ‘सी’ मा एपीएफ, एनआरएनए र सुदूरपश्चिम तथा समूह ‘डी’ मा गण्डकी र वाग्मती प्रदेश छन् ।

प्रतियोगितामा समूहका शीर्ष दुई टिम क्वाटरफाइनल पुग्ने छन् । पुरुष भलिबलको फाइनल कात्तिक ३ मा हुनेछ ।