काठमाडौं । ग्रिनल्यान्डले पाँचौं बीएनए कप अन्तरविद्यालय बास्केटबल प्रतियोगितामा शुक्रबार तेहोरो जित निकालेको छ । ग्रिनल्यान्डले सिनियर ब्वाइज÷गल्र्स र जुनियर ब्वाइजमा जित हात पारेको हो ।
सिनियर ब्वाइजमा ग्रिनल्यान्डले स्कोलर्स होमलाई ६९–३० ले पराजित गर्यो । ग्रिनल्यान्डको जितमा दिवस भुजेलले २५ अंक योगदान गरे ।
सिनियर गल्र्समा जेनिशा श्रेष्ठको ६ अंक सहयोगमा ग्रिनल्यान्डले फेरिल्यान्डलाई १४–४ ले हरायो । जुनियर ब्वाइजमा हिमरश्मी विरुद्धको खेलमा ग्रिनल्यान्ड २०–६ ले विजयी भयो । ग्रिनल्यान्डका आयुश घलेले ८ स्कोर गरे।
सिनियर ब्वाइजको अन्य खेलमा एन्जल्स हार्टले काठमाडौं ग्लोबललाई ३४–२, गोल्डेनपिकले युनिभर्सिटीलाई ५०–१० र लालीगुराँसले हिमरश्मीलाई ४०–१५ ले पन्छाए । एन्जल्स हार्टका विवश गर्बुजाले ७, गोल्डेनपिकका दिनेश रपालले १२ तथा लालीगुराँसका दीपेश थापाले ११ अंक बटुले ।
जुनियर ब्वाइजमा स्किब्सले काठमाडौं ग्लोबललाई ९–२ तथा एन्जल्स हार्टले गोल्डेनपिकलाई १८–११ ले पाखा लगाए । स्किब्सका अनुज लिम्बूले ७ तथा एन्जल्स हार्टका प्रतीक कँडेलले १० स्कोर गरे ।
