काठमाडौं । नेपाल भलिबल संघ निर्वाचनमा होमिएको छ । नयाँ नेतृत्व चयनका लागि भलिबल संघ जिल्ला र प्रदेश निर्वाचनमा होमिएको हो । जिल्ला र प्रदेशको निर्वाचन सम्पन्न गरेसँगै केन्द्रिय निर्वाचनको मिति तय गर्ने संघको तयारी छ ।
पोखरामा जेठ २१ गते सम्पन्न केन्द्रिय कमिटिको पूर्ण बैठकले जिल्ला र प्रदेशको निर्वाचन असार १० गतेभित्र सक्ने निर्णय गरेको थियो । देश संघीय संरचनामा गैसकेपछि भलिबल संघको निर्वाचन पहिलो पटक हुन लागेको हो ।
संघको वर्तमान कार्यसमितिको चार वर्षे कार्यकाल दुई वर्षअघिनै सकिएको थियो । तर १३ औं दक्षिण एसियाली खेलकुद र कोभिड महामारीका कारण संघको साधारण सभा हुन सकेन । खेलकुद विकास ऐन २०७७ कार्यान्वयनमा आएपछि संघको निर्वाचन गर्न कानुनी रुपमै समस्या परेको थियो ।
गत हप्ता पोखरामा सम्पन्न केन्द्रिय कमिटिको पूर्ण बैठकले असार ७ भित्र जिल्ला र १० गतेभित्र प्रदेशको निर्वाचन सक्ने निर्णय गरेको थियो । सोही अनुसार जिल्ला र प्रदेशका लागि केन्द्रिय प्रतिनिधि तोकिएको थियो । प्रदेश नम्बर १ को संयोजकमा मदन खड्का, मधेश प्रदेशमा उपेन्द्र यादव, बागमतीमा कुमार राज सुबेदी, गण्डकीमा याम गुरुङ, लुम्बिनीमा निरोज मास्के, कर्णालीमा ऐनबहादुर शाही र सुदुरपश्चिममा हरक सिंह धामीलाई केन्द्रिय प्रतिनिधिको रुपमा संयोजक तोकिएको छ ।
प्रदेश संयोजक बनेका केन्द्रिय प्रतिनिधिहरु जिल्ला निर्वाचनको तयारीमा जुटेका छन् । जिल्ला निर्वाचन सकेर प्रदेशको निर्वाचन सक्ने केन्द्रिय प्रतिनिधिको तयारी छ ।
संघका सचिव मनवीर छन्तयालले केही दिनमै जिल्ला निर्वाचनको मिति सार्वजनीक गरिने खेलपाटीलाई बताए ।
‘असार ७ भित्र जिल्ला र १० गतेभित्र प्रदेशको निर्वाचन सक्ने गरि तयारी अघि बढेको छ । अधिकांश जिल्लाको साधारण सभाको मिति केही दिनमा सार्वजनीक हुनेछ ।’ उनले भने ।
भलिबल संघको जिल्ला र प्रदेश निर्वाचनका लागि आसन्न केन्द्रिय निर्वाचनसँग समेत जोडिएर हेरिएको छ । जिल्ला र प्रदेशबाट आउने प्रतिनिधिनै केन्द्रिय निर्वाचनमा सहभागी हुने भएकाले असार १० गतेभित्र केन्द्रिय निर्वाचनको प्रारम्भिक रुपरेखा देखिनेछ ।
आसन्न केन्द्रिय निर्वाचनमा वर्तमान उपाध्यक्ष निरोज मास्केले सार्वजनीक रुपमै नेतृत्वमा दाबी गरिसकेकी छिन् । संघको वर्तमान पदाधिकारीबाट पनि नयाँ नेतृत्वमा दाबी आउने सम्भावना छ । वर्तमान नेतृत्वको शारीरिक अस्वस्थता र निस्कृयताका कारण भलिबल संघमा नयाँ नेतृत्व आउने देखिन्छ ।
-1731292263.jpg)
-1732590134.webp)
