काठमाडौं । आयोजक रोयल स्पोर्ट्स सेन्ट्रलले जिएए तेश्रो रोयल यु–२३ पुरुष बास्केटबल प्रतियोगिताको उपाधि बुधबार जितेको छ । रोयलको यो ह्याट्रिक उपाधि हो ।
ललितपुरको सानागाउँस्थित घरेलु कोर्टमा भएको प्रतिस्पर्धात्मक फाइनलमा रोयलले टाइम्स इन्टरनेसनल कलेजलाई ८५–८४ ले पराजित गर्दै ह्याट्रिक उपाधि पूरा गर्यो । ह्याट्रिक उपाधि यात्रामा यसअघिका फाइनलमा पनि रोयलले टाइम्सलाई नै हराएको थियो । रोयलका निकेश मगरले ३४ स्कोर गरे । टाइम्सका मनीष केसीले ३७ अंक जोडे ।
निर्धारित चार क्वाटरको खेल ६७–६७ को बराबरीमा सकिएको थियो । त्यसपछि पनि दुई पटक अत्तिरिक्त समय थप्नु परेको थियो । थप गरिएको पहिलो ५ मिनेटको अत्तिरिक्त समयको खेल पनि १०–१० को बराबरीमा टुंगियो । दोश्रो पटक थप गरिएको ५ मिनेटको अत्तिरिक्त समयमा रोयल ८–७ ले अगाडि रहँदै समग्रमा फाइनल खेल १ अंकले जित्यो ।
उपाधिसंगै रोयलले ५० हजार नगद पुरस्कार पायो भने टाइम्सले १५ हजार नगदमा चित्त बुझाए । रोयलका आशिष बस्नेत ‘मोस्ट भेलुएबल प्लेयर’ घोषित भए । उनले ५ हजार नगदसहित शेर्पा चाइको गिफ्ट ह्याम्पर प्राप्त गरे । मोफसलको धरान मेघा कलेजले उदीयमान टिमको उपाधि हात पा¥यो ।
विजेतालाई नेपाल बास्केटबल संघका कार्यवाहक अध्यक्ष भीमसिंह गुरुङ, गोदावारी अल्मुनाइ एसोसिएन (जिएए) का अध्यक्ष प्रकाशबाबु केसी र शेर्पा चाइका हेड ब्रिवर दिल्लीराम कोइरालाले एक कार्यक्रमबीच पुरस्कृत गरे । साताव्यापी प्रतियोगितामा १० टिमले लिग कम नकआउट आधारमा प्रतिस्पर्धा गरेका थिए ।
जिएएको आयोजनामा रोयलकै कोर्टमा भइरहेको फादर वाट्रिन स्मृति महिला खुला बास्केटबल प्रतियोगिताको उपाधिका लागि रोयल र जेभियर इन्टरनेसनल कलेज बिहीबार भिड्दै छन् ।
