प्यानल बनाउन शेर्पा र नेम्वाङ्गको कसरत

काठमाडौं । अखिल नेपाल फुटबल संघ (एन्फा)को आसन्न निर्वाचनका लागि दुई पक्ष प्यानल निर्माणको गृहकार्यमा जुटेको छ । जिल्ला, संघ र क्लबबाट मताधिकार प्राप्त प्रतिनिधिको नाम केन्द्रमा आएसँगै दुवै पक्ष प्यानल बनाउने गृहकार्यमा जुटेको हो । 

एन्फाको आसन्न असार ६ गतेको केन्द्रिय निर्वाचनका लागि वर्तमान अध्यक्ष कर्माछिरिङ शेर्पा र वरिष्ठ उपाध्यक्ष पंकजबिक्रम नेम्वाङ्ग नेतृत्वका लागि तयारी गरिरहेका छन् । एन्फाको सदस्य जिल्ला, संघ र क्लबको साधारण सभाबाट आएका नयाँ नेतृत्वसँग वर्तमान अध्यक्ष शेर्पा र नेम्वाङ्ग निरन्तर सम्पर्क र छलफलमा छन् ।

एन्फाका ४८ सदस्य जिल्ला मध्य ४५ जिल्लाले मताधिकार सहित केन्द्रिय निर्वाचनमा भाग लिन पाउछन् । सदस्य जिल्ला मध्य संखुवासभा, गोरखा र कास्की मताधिकारबाट छुटेका छन् । संखुवासभा शेर्पा निकट र गोरखा, कास्की नेम्वाङ्ग निकट जिल्ला हुन् । केन्द्रिय निर्वाचनमा ए डिभिजनका १४, बी डिभिजनका ११ र सी डिभिजनका ९ क्लबले मताधिकार प्राप्त गरेका छन् । चार संघ, राष्ट्रिय लिगका लागि छनोट चार क्लब समेत मताधिकार सहित एन्फा निर्वाचनमा सहभागी हुनेछन् । एन्फाको आसन्न निर्वाचनमा ८७ भोट खस्नेछ । बहुमत प्राप्त गर्ने ब्यक्ति एन्फाको चार वर्षे कार्यकालका लागि नेतृत्वमा चुनिनेछ । 

एन्फाको अघिल्लो निर्वाचनमा एकै प्यानलबाट चुनावी प्रतिस्पर्धा गरेका शेर्पा र नेम्वाङ्ग अहिले बेग्ला बेग्लै प्यानल सहित चुनावी मैदानमा उत्रने तयारी गरेका छन् । शेर्पा समुहबाट चुनाव जितेका नेम्वाङले असन्तुष्ट पदाधिकारीको साथ लिएर बेग्लै प्यानल निर्माणको तयारी गरेका छन् । अध्यक्ष शेर्पासँग असन्तुष्ट वर्तमान कार्यसमितिका पदाधिकारीहरु नेम्वाङ्गसँग छन् । अघिल्लो चुनावमा शेर्पाविरुद्ध लडेका जिल्ला तथा क्लबलाई नेम्वाङ्ग पक्षले समेटेको छ । एन्फाको नयाँ निर्वाचित कार्यसमिति २१ सदस्यीय हुनेछ । संशोधित विधान अनुसार यसपटक वरिष्ठ उपाध्यक्षमा समेत निर्वाचन हुनेछ । महासचिव र कोषाध्यक्ष मनोनित हुनेछन् ।

साधारण सभामार्फत जिल्ला, संघ र क्लबमा आएका नयाँ नेतृत्व मध्य केही खुलेर पक्ष÷विपक्षमा लागेका छन्, केही चुप बसेका छन् । मध्यमार्गी धारमा रहेका केही जिल्ला, क्लब र संघलाई दुवैपक्षले आफ्नो कित्तामा उभ्याउन सक्दो कोशिश गरिरहेका छन् । विपक्षी कित्तामा भएका प्रभावशाली प्रतिनिधिलाई आफ्नो प्यानलमा ल्याउन सक्दो कोशिश भैरहेको छ । 

शेर्पा पक्षका एक पदाधिकारी प्यानल निर्माणमा आफुहरुलाई खासै समस्या नरहेको बताउँछन् । ‘साथीहरुको सुझाव अनुसार अघि बढ्ने हो । प्यानल बनाउन खासै समस्या छैन । पदाधिकारीमा केही आकांक्षी छन् । तर सहमती अनुसारनै सबै टुङ्गिन्छन् ।’ उनी भन्छन् । 

संस्थापन पक्षबाट वर्तमान अध्यक्ष कर्माछिरिङ शेर्पालेनै नयाँ नेतृत्वका लागि दोहोरिने पक्का छ । महासचिव इन्द्रमान तुलाधरको ‘मुभ’ अनुसार अन्य पदाधिकारी टुङ्गो लगाउने संस्थापन पक्षको तयारी छ । अध्यक्ष शेर्पा वर्तमान महासचिव तुलाधरलाई वरिष्ठ उपाध्यक्षमा मनाएर आफुपछिको नेतृत्वका लागि तयार पार्न चाहन्छन् । महासचिवमै दोहरिने वा वरिष्ठ उपाध्यक्षमा बस्ने रोजाई इन्द्रमान समक्ष छ । तर आन्तरिक बैठकमा तुलाधरले महासचिवमै दोहरिने इच्छा देखाएका छन् । तुलाधर महासचिवमै बस्ने भएपछि वरिष्ठ उपाध्यक्षमा शिक्षित पराजुलीले उम्मेदवारी दिने तयारी छ । इन्द्रमान आउने भए आफु उपाध्यक्षमै बस्ने तर इन्द्रमान महासचिवमा दोहरिने भए वरिष्ठमा आफुले उम्मेदवारी दिने पराजुलीले बताउने गरेका छन् । उनको दाबीमा शेर्पा समुहकै अधिकांश पदाधिकारीको सहमती छ । लिग कमिटिको संयोजक रहेका बिज्ञानराज शर्माले समेत वरिष्ठ उपाध्यक्षमा दाबी गरेका छन्, तर एन्फा राजनीतिमा उनको खासै पकड छैन । सोही कारण वरिष्ठमा पराजुलीकै पल्लाभारी देखिन्छ ।

संस्थापन पक्षका अन्य उपाध्यक्षमा उपेन्द्रमान सिंह दोहरिने पक्कापक्की छ । वर्तमान कार्यसमितिमा राजनीतिक र प्राविधिक हिसाबले आफुलाई साथ दिएका सिंहलाई उपाध्यक्षमा दोह¥याउन अध्यक्ष शेर्पाकै जोडबल छ । संस्थापन पक्षको उपाध्यक्षको अर्का उम्मेदवार हुन्, कुमार केसी । अध्यक्ष शेर्पाको मुख्य सारथी मानिएका केसीेको जिल्ला र एन्फा राजनीतिमा राम्रो पकड भएको मानिन्छ । आर्थिक पारदर्शीताको मामिलामा ‘क्लिन’ र एन्फाभित्रको सत्ताभोगबाट टाढै बस्न रुचाउने केसी वर्तमान अध्यक्ष शेर्पालाई संकट पर्दा काठमाडौंमा देखिने गर्छन् । अधिकांश समय बुटवलमै बस्ने केसी जिल्लालाई आधार बनाएर फुटबल र पाटी राजनीतिमा सक्रिय छन् । संस्थापन पक्षको अर्को एक उपाध्यक्षको टुङ्गो लाग्न बाँकी छ । त्यसमा रत्नकुमार श्रेष्ठदेखि पूर्णमान चित्रकारको सम्भावना अधिक देखिन्छ । 

अध्यक्षका अर्का दाबेदार पंकज बिक्रम नेम्वाङ्गले समेत प्यानल बनाउने गृहकार्यलाई तिव्रता दिएका छन् । उनले आफु टिम बनाउनका लागि छलफलमै रहेको बताउँछन् । ‘छलफल हुदैछ । मनोनयन हुन्छ । टिमपनि संगसंगै बन्छ ।’ उनले खेलपाटीसँग भनेका छन् । 

अध्यक्षमा नेम्वाङ्गलेनै उम्मेद्वारी दिने पक्कापक्की छ । नेम्वाङ्ग प्यानलबाट वरिष्ठ उपाध्यक्षको उम्मेद्वार समेत ‘क्लियर’ छ । वरिष्ठ उपाध्यक्षमा नेम्वाङ्ग प्यानलबाट वीरबहादुर खड्काले उम्मेद्वारी दिने तयारी गरेका छन् । वरिष्ठ उपाध्यक्षलाई एन्फाभित्र फुटबलको भावी नेतृत्वको रुपमा समेत हेरिन्छ । नेम्वाङ्ग प्यानलबाट उपाध्यक्षको उम्मेद्वारमा अर्का पक्का भएको नाम हो, विराटजंग शाही । खेलाडी र व्यवस्थापकको रुपमा फुटबलमा लामो समय योगदान गरेका श्रेष्ठलाई उपाध्यक्षको रुपमा उम्मेदवार बनाउन नेम्वाङ्ग पक्षका सबै तयार छन् । नेम्वाङ्ग पक्षबाट उपाध्यक्षको रुपमा अन्य धेरै आकांक्षी छन् । थ्री स्टार क्लबका अध्यक्ष अरुणमान जोशी, सुरेश शाह, दिपक खतिवडा, दिनेश ब्यन्जनकार लगायत उपाध्यक्षका सम्भावित उम्मेदवार रहेका छन् । नेम्वाङ्ग पक्षका किरण राईले महासचिवमा इच्छा देखाएका छन् । त्यसैले उनी उपाध्यक्षको दौडमा छैनन् । खुलेर आफुलाई साथ दिदै आएका कैलालीका अनिल मल्लदेखि बाँकेका भोजराज शाहीलाई उपयुक्त जिम्मेवारी दिने चुनौती नेम्वाङ्ग समक्ष छ । 

आसन्न नेतृत्वका लागि दाबी गरेका शेर्पा र नेम्वाङ्ग पक्षले जिल्ला फुटबल संघमा आफ्नो पकड बनाउन जोडतोडले मेहनत गरिरहेका छन् । मुख्य गरि एक नम्बर र बागमती प्रदेशमा नेम्वाङ्ग पक्षको अवस्था राम्रो देखिन्छ । गण्डकी र लुम्बिनी प्रदेशमा शेर्पा पक्ष बलियो छ । दुई नम्बर प्रदेशलाई आफ्नो पक्षमा पार्न शेर्पा र नेम्वाङ्गले मेहनत गरिरहेका छन् । क्लब र संघमा आफु बलियो रहेको दुवैपक्षको दाबी छ । एन्फा निर्वाचनको ८७ भोटमा ५५ बढी मत आफुसँग रहेको दुवै पक्षको दाबी छ ।