रोहनको २ गोलसँगै सलहेश फाइनलमा

अर्जुन काफ्ले, पथरी (मोरङ)। सिरहाको सलहेश युथ क्लबले उत्कृष्ट प्रदर्शन गर्दै दोस्रो इन्ट्रा पथरीशनिश्चरे गोल्डकप फुटबल प्रतियोगिताको फाइनलमा स्थान सुरक्षित गरेको छ।

पथरी रंगशालामा बुधबार भएको पहिलो सेमिफाइनलमा सलहेशले पाँचथर क्लब पाँचथरलाई ४–१ को फराकिलो अन्तरले पराजित गर्दै फाइनलको यात्रा तय गरेको हो।

पहिलो हाफ गोलरहित बराबरीमा सकिए पनि दोस्रो हाफमा खेल पूर्ण रूपमा सलहेशको नियन्त्रणमा रह्यो। खेलको ७१औं मिनेटमा रोहन कार्कीले गोल गर्दै सलहेशलाई अग्रता दिलाए।

त्यसको चार मिनेटपछि पाँचथरका अभिषेक लिम्बूले बराबरी गोल फर्काए। तर, त्यसपछि सलहेशले खेलमा पूर्ण दबदबा कायम राख्दै लगातार तीन गोल थप्यो।

दोस्रो हाफको ८२औं मिनेटमा रोमन भुजेलले टोलीलाई पुनः अग्रता दिलाए। ८४औं मिनेटमा रोहनले व्यक्तिगत दोस्रो गोल गर्दै अन्तर ३–१ बनाए। वैकल्पिक खेलाडीका रूपमा मैदान प्रवेश गरेका कोमल खवासले अतिरिक्त समयमा गोल गर्दै जितलाई ४–१ मा पक्का गरे।

सलहेशका गोलकिपर रेम्बो चौधरीले पहिलो हाफमा पाँचथरका निकै जोखिमपूर्ण अवसरहरू रोकेर टोलीलाई खेलमा टिकाइराखेका थिए। उत्कृष्ट प्रदर्शन गरेका रोहन ‘म्यान अफ द म्याच’ घोषित भए।