छोराले गर्दा रोनाल्डोले आफ्नी प्रेमिकासँग बिहेको प्रस्ताब राखे !

काठमाडौं। पोर्चुगलका सुपरस्टार क्रिस्टियानो रोनाल्डोले हालै लामो समयकी प्रेमिका जर्जिना रोड्रिग्वेजसँग इगेजमेन्ट गरेका छन्। बिहेको मिति घोषणा गरिएको छैन। तर, सम्भवतः आगामी वर्ष विश्वकपपछि यो ‘राजकिय’ विवाह हुनेछ भन्ने अनुमान गरिएको छ।

ब्रिटिस पत्रकार पियर्स मोर्गनसँगको अन्तर्वार्तामा रोनाल्डोले खेलमैदानदेखि निजी जीवनसम्मका विषयमा खुलस्त कुरा गरे। जर्जिनालाई विवाह प्रस्ताव गर्न सानो दुई सन्तानले नै प्रेरित गरेको उनले खुलासा गरे।

रोनाल्डोले भने,‘मैले महँगो औँठी किनें, त्यसपछि मेरा साना बच्चाहरूले बाबा, अब आमा (जर्जिना) लाई बिहेको प्रस्ताव गर्नुहोस् भने। मलाई लाग्यो यो नै सही समय हो। ऊ मेरा बच्चाहरूकी आमा भएकीले होइन, उनी मेरो जीवनको प्रेम हो। यो साँच्चै उपयुक्त क्षण हो।’

४० वर्षीय रोनाल्डोले भावनात्मक स्वरमा सन् २०२२ मा जन्मपूर्व नै आफ्ना जुम्ल्याह बच्चामध्ये एकको मृत्यु भएको दुखद् घटनाले उनी र जर्जिनाको सम्बन्ध अझनजिक बनायो।

उनका शब्दमा त्यो कठिन समय थियो, तर सुन्दर पनि। किनभने उनले धेरै कुरा सिके। ‘जीवनलाई नयाँ दृष्टिकोणबाट हेर्न सिकें। अहिले तीन वर्षकी मेरी छोरी घरकी रानी जस्तै छ। उसले घरमा हाँसो र खुशी ल्याउँछिन्। सबै कुरा कुनै न कुनै कारणले हुन्छ। हामी एउटा धन्य परिवार हौं, म यसमा गर्व गर्छु,’ उनले भने।

रोनाल्डोले जर्जिनाबारे थप्दै भने, ‘जिओ (जर्जिना रोड्रिग्वेज) असाधारण छिन्। उनी मेरो र मेरो परिवारको हेरचाह गर्छिन्, जुन धेरै ठूलो कुरा हो। उनी परिवार र घरको जिम्मेवारीले भरिपूर्ण छिन्, जुन सजिलो होइन। कसैले उल्टो चाह्यो भने म सम्भवतः त्यसो गर्न सक्दिन। वास्तवमा पुरुषहरू गर्न सक्दैनन्। उनी नै त्यस्तो व्यक्ति हो, जसले मलाई बुझ्छिन् र मेरो साथ दिन्छिन्। म जीवनभर यस्तो कसैलाई खोजिरहेको थिएँ।’

यो अन्तर्वार्ताको पहिलो भाग नोभेम्बर ४ मा सार्वजनिक गरिएको हो। दोस्रो भागमा उनले अमेरिकाका पूर्वराष्ट्रपति डोनाल्ड ट्रम्प र आफ्ना दिवंगत साथी डियागो जोटाको निधनबारे प्रतिक्रिया दिनेछन्।