दशौं राष्ट्रिय खेलकुद फागुन १ देखि ७ सम्म आयोजना गर्ने निर्णय

काठमाडौं। दशौं राष्ट्रिय खेलकुद प्रतियोगिता २०८२ साल फागुन १ गतेदेखि ७ गतेसम्म आयोजना गर्ने निर्णय गरिएको छ।

राष्ट्रिय खेलकुद परिषद्को बुधबार बसेको बोर्ड बैठकले राष्ट्रिय प्रतियोगिता फागुनको पहिलो साता आयोजना गर्ने निर्णय गरेको हो।

खेलकुदमन्त्रीको रूपमा आएपछि पहिलो बोर्ड बैठकबाट बब्लु गुप्ताले दशौं राष्ट्रिय खेलकुद प्रतियोगिताको निर्णय गराएका हुन्। २०७९ सालमा पोखरामा भएको नवौं राष्ट्रिय खेलकुद प्रतियोगितामा कर्णाली प्रदेशले दशौं राष्ट्रिय खेलकुदको झण्डा लिएको थियो ।

प्रत्येक दुई वर्षमा हुने भनिएको दशौं राष्ट्रिय खेलकुद गत वर्ष आयोजना हुन सकेन। जेन्जी आन्दोलनको बलमा नयाँ खेलकुदमन्त्रीको रुपमा आएका गुप्ताले यस वर्ष राष्ट्रिय खेलकुद प्रतियोगिता आयोजना गर्ने निर्णय गरेका हुन्।