अस्मिता र स्वस्तिका पहिलो

काठमाडौं । भक्तपुरकी अस्मिता दुवाल र रामेछापकी स्वस्तिका तिरुवाले गणेशमान सिंह स्मृति राष्ट्रिय बक्सिङ प्रतियोगिताअन्तर्गत बागमती प्रदेशस्तरीय छनोटमा पहिलो स्थान हात पारेका छन् ।

भक्तपुरको सानोठिमीमा शुक्रबार भएको  महिला ५१ केजी तौल समूहको फाइनलमा अस्मिताले रोपिना रञ्जितकारलाई पराजित गरिन् ।

यसैगरी महिला ५७ केजी तौल समूहमा स्वस्तिकाले धादिङकी रितिका श्रेष्ठलाई पराजित गर्दै काठमाडौंमा हुने राष्ट्रिय प्रतियोगिताका लागि छनोट भइन् ।

महिलाकै ६० केजी तौल समूहमा धादिङकी शशिकला राईले रामेछापकी प्रसुना खत्रीलाई पराजित गर्दै पहिलो स्थान हात पारिन् ।

वीर गणेशमान सिंह स्पोर्ट्स कमिटीको आयोजनामा भएको छनोट प्रतियोगिताको पुरुष ५७ केजीमा रामेछापका करण लोहारले फाइनलमा स्थान बनाए ।

सेमिफाइनल भिडन्तमा उनले धादिङका सुलभ डंगोललाई पराजित गरे । यही तौल समूहमा काठमाडौंका मार्सल गुरुङले पनि फाइनलमा स्थान बनाए । उनले नुवाकोटका आङपेम्वा शेर्पालाई पराजित गर्दै करणसँगको उपाधि भिडन्त पक्का गरे ।

पुरुष ७५ केजीमा काठमाडौंका अतुल्य भण्डारीले रसुवाका साहिल राईलाई पराजित गर्दै फाइनलमा स्थान पक्का गरे।

गणेशमान सिंह स्मृति राष्ट्रिय बक्सिङ प्रतियोगिताअन्तर्गत नै प्रदेश १ को छनोट प्रतियोगितामा उदयपुरका नारायण भुजेल र झापाका धमेन्द्र राईले फाइनलमा स्थान बनाएका छन् ।

शुक्रबार भएको पुरुष ५२ केजी तौल समूहमा सुनसरीका पुनम राई र धमेन्द्रले सुनसरीकै सागर यादवलाई पराजित गर्दै उपाधि भिडन्त पक्का गरे ।

पुरुषकै ५७ केजीमा झापाका भुगल लिम्बू र सिंहवीर लिम्बूले फाइनलमा स्थान बनाए । भुगलले झापाका सुरेन्द्र राई र सिंहवीरले उदयपुरका वसन्त राईलाई पराजित गरे । यसैगरी ६३ केजीमा झापाका टोविन प्रधानले सुनसरीका भुमिक थापा र उदयपुरका रोशन मगरले झापाका सुजन राईलाई पराजित गर्दै अन्तिम दुई स्थान पक्का गरे ।

यसैगरी महिलाको ५२ केजीमा सुनसरीकी कृतिका राई र झापाकी सुस्मिता श्रेष्ठले फाइनलमा स्थान बनाए । कृतिकाले उदयपुरकी मुस्कान तुलाधर र सुस्मिताले झापाकी अनिषा कुमाललाई पराजित गरे ।

महिलाकै ५७ केजीमा झापाकी सुस्मिता राईले झापाकै सुस्मिता लिम्बूलाई पराजित गर्दै उपाधि भिडन्त पक्का गरिन् ।

वीर गणेशमान सिंह स्पोर्ट्स कमिटीको आयोजनामा २०७९ बैशाख ६ देखि १० गतेसम्म काठमाडौंको बसन्तपुर डबलीमा हुने प्रतियोगितामा पुरुषतर्फ सात र महिलामा पाँच तौल समूहमा प्रतिस्पर्धा हुनेछ ।

प्रतियोगितामा पुरुषतर्फ ४८, ५२, ५७, ६३, ६९, ७५ र ८१ तौल समूहमा प्रतिस्पर्धा हुनेछ । यसैगरी महिलातर्फ ४८, ५४, ५७, ६४, ६९ केजी तौल समूहमा प्रतिस्पर्धा हुनेछ ।

प्रतियोगितामा सात प्रदेश र तीन विभागीय टोलीका खेलाडीहरूबीच प्रतिस्पर्धा हुनेछ । राष्ट्रिय प्रतियोगितामा हरेक तौल समूहमा पहिलो, दोस्रो र तेस्रो स्थान हासिल गर्ने खेलाडीले आकर्षक नगद पुरस्कार प्राप्त गर्ने छन् भने उत्कृष्ट महिला र पुरुष खेलाडीले स्कुटर र मोटरसाइकल पाउने छन् ।