आर्मी र हरियाणा सेमिफाइनलमा

नेपालगन्ज । विभागीय टोली त्रिभुवन आर्मी क्लब र भारतको हरियाणा स्पोर्ट्स क्लब आठौं प्रधानमन्त्री कप अन्तर्राष्ट्रिय आमन्त्रण महिला भलिबल प्रतियोगिताको सेमिफाइनलमा प्रवेश गरेको छ ।

आर्मी र हरियाणा समूह विजेता बन्दै अन्तिम चारमा पुगेको हो । नेपालगन्ज रंगशालास्थित कभर्डहलमा शनिबार हरियाणा स्पोर्ट्स क्लबले लुम्बिनी युनाइटेडलाई २५-१५, २५-७ र १५-१३ को सोझो सेटमा पराजित गरेको हो ।

खेलमा हरियाणाकी निर्मल प्लेयर अफ द म्याच घोषित भइन् । निर्मल नेपालमा सम्पन्न १३औं दक्षिण एशियाली खेलकुद(साग)मा भारतीय राष्ट्रिय भलिबल टिमकी कप्तान थिइन् ।

हरियाणा पुल ए विजेता बन्दै सेमिफाइनल प्रवेश गरेको हो । सेमिफाइनलमा हरियाणाले न्यु डायमन्ड एकेडेमीसँग खेल्नेछ ।

त्यसैगरी दोस्रो खेलमा त्रिभुवन आर्मी क्लबले भारतीय टिम एकलव्य स्पोर्ट्स कम्प्लेक्सलाई २५–१२, २५–१२ र १५–१२ ले हरायो । उक्त खेलमा त्रिभुवन आर्मीकी संगम महतो प्लेयर अफ द म्याच भइन् ।

आर्मी पनि पुल बी तर्फ विजेताको हैसियतमा पुल ए को उपविजेता नेपाल पुलिससँग खेल्नेछ ।

आइतबार हुने पहिलो सेमिफाइनलमा हरियाणा र न्यु डायमन्ड तथा दोस्रो सेमिफाइनलमा आर्मी र नेपाल पुलिस क्लबबीच हुनेछ ।  

प्रतियोगिताको विजेताले ५ लाख, उपविजेताले २ लाख ५० हजार, तेस्रो टिमले एक लाख र चौथो हुने टोलीले ५० हजार नगद, पदक र प्रमाणपत्र प्राप्त गर्नेछन् ।