धनगढी । त्रिभुवन आर्मी क्लब र नेपाल पुलिस क्लब मुख्यमन्त्री कप राष्ट्रिय पुरुष भलिबल प्रतियोगिताको फाइनलमा भिड्ने भएका छन्।
शुक्रबार भएको पहिलो सेमिफाइनलका अर्को विभागिय टोली एपीएफलाई ३–१ को सेटले पराजित गर्दै आर्मी उपाधि नजिक पुगेको हो ।
पहिलो र दोस्रो सेट २५–२१ र २५–१६ ले जितेको आर्मीले तेस्रो सेट भने २४–२६ ले गुमाएको थियो । तर, चौथो सेट २५–१८ ले जित्दै आर्मी फाइनलमा पुग्न सफल भयो । म्यान अफ द म्याच आर्मीका मानबहादुर श्रेष्ठ भए।
दोस्रो सेमिफाइनलमा गण्डकी प्रदेशलाई ३–२ को सेटले पराजित गर्दै पुलिसले आर्मीसँगको भेट पक्का गर्यो ।
पहिलो र दोस्रो सेट २५–१६ र २५–१९ ले जितेको पुलिस क्लबले तेस्रो र चौंथो सेट २२–२५ र २३–२५ ले गुमाएको थियो । त्यसफी पाँचौ सेट १५–१२ ले जित्दै पुलिस क्लब उपाधि नजिक पुगेको हो । खेलका म्यान अफ द म्याच पुलिस क्लबका रविन चन्द भए।
फाइनल खेल शनिबार बिहान ९ बजे हुने आयोजक सुदूरपश्चिम प्रदेश खेलकुद परिषद्ले जनाएको छ। प्रतियोगिताको विजेताले नगद चार लाख, उपविजेताले दुई लाख, तेस्रो हुने टोलीले एक लाख र चौथो स्थान प्राप्त गर्ने टिमले ५० हजार नगदसहित ट्रफी र मेडल प्राप्त गर्नेछन्।
प्रतियोगिताको सर्वोत्कृष्ट खेलाडीलाई नगद २० हजार तथा उदयमान खेलाडी, उत्कृष्ट लिफ्टर, उत्कृष्ट स्पाइकर, उत्कृष्ट ब्लकर, उत्कृष्ट डिफेन्सर, उत्कृष्ट सर्वर र उत्कृष्ट प्रशिक्षकलाई जनही १० हजारसहित पुरस्कृत गरिने छ।
-1732590134.webp)
